បរទេស៖ លោក Steven Gerrard អ្នកចាត់ការទូទៅរបស់ក្លិប Aston Villa បានចាត់ទុកថា Philippe Coutinho ជាកីឡាករ «មិនអាចកាត់ថ្លៃបាន» ក្រោយពីតារាឆ្នើមអន្តរជាតិប្រេស៊ីលរូបនេះ បានបំពេញការត្រួតពិនិត្យសុខភាពរបស់គេ នៅមុនពេលការផ្ទេរពីក្លិប Barcelona។
Aston Villa បានបញ្ជាក់ថា Coutinho បានឆ្លងផុតការពិនិត្យសុខភាពរួចរាល់ហើយ ហើយថា រូបគេកំពុងតែស្ថិតក្នុងប្រទេសបារាំង ស្របពេលដែលរូបគេបានទទួលលិខិតអនុញ្ញាតឲ្យធ្វើការរួចរាល់ហើយ។ កីឡាករវ័យ២៩ឆ្នាំរូបនេះ ត្រូវបានរំពឹងទុកថា នឹងចូលរួមជាមួយនឹងមិត្តរួមក្រុមថ្មីរបស់គេនៅទីលានហ្វឹកហាត់ Bodymoor Heath របស់ក្លិប Aston Villa នៅថ្ងៃពុធ សប្តាហ៍នេះ។ លោក Gerrard បានលេងរួមគ្នាជាមួយនឹង Coutinho នៅឯក្លិប Liverpool និងជឿជាក់ថា ខ្សែបម្រើប្រយុទ្ធរូបនេះ នឹងបង្កើតឲ្យមានឥទ្ធិពលដ៏ធំមួយក្នុងពេលវិលទៅកាន់ក្របខ័ណ្ឌ Premier League វិញ។
លោក Gerrard បានប្រាប់គេហទំព័ររបស់ក្លិប Aston Villa កាលពីថ្ងៃចន្ទថា៖ «វត្តមានរបស់គេ នឹងក្លាយជារឿងមិនអាចកាត់ថ្លៃបានឡើយ ស្របពេលដែលបញ្ហារបួស និងការចូលរួមក្នុងយុទ្ធនាការ AFCON បានកាត់បន្ថយជម្រើសក្នុងតំបន់ប្រយុទ្ធរបស់យើង»៕
ប្រភពព័ត៌មាន៖ Channel News Asia