បុរសវ័យ៤៨ឆ្នាំ ដែលមានបទពិសោធជាគ្រូបង្វឹកចំនួន១៨ឆ្នាំ ជាមួយការកាន់វិញ្ញាបនបត្រគ្រូបង្វឹកកម្រិត UEFA Pro Licence និងធ្លាប់ប្រកបអាជីពជាកីឡាករចំនួន១៧ឆ្នាំនោះ នឹងក្លាយជាគ្រូបង្គោលថ្មីរបស់ក្រុមគិរីវង់សុខសែនជ័យ សម្រាប់ការប្រកួតនារដូវកាលថ្មីនេះ។
ក្លិបគិរីវង់សុខសែនជ័យ នៅមិនទាន់បង្ហាញឈ្មោះជាផ្លូវការ ចំពោះគ្រូបង្គោលថ្មីរបស់ខ្លួន នៅឡើយទេ ប៉ុន្តែបើតាមថ្នាក់ដឹកនាំរបស់ក្លិបមួយនេះ បានបង្ហើបថា គ្រូបង្វឹកថ្មីនេះ ជាជនជាតិអេស្ប៉ាញ ហើយឈ្មោះរបស់គាត់ នឹងត្រូវប្រកាសជាផ្លូវការ នៅថ្ងៃទី២៣ ខែមករា ខាងមុខនេះ គឺនៅពេលលោកត្រូវដឹកនាំក្រុមគិរីវង់ ចូលរួមការប្រកួតបាល់ទាត់ដណ្ដើមពានរង្វាន់ Prince Beer Pre-Season Cup 2022 ដែលត្រូវធ្វើពីថ្ងៃទី២១ ខែមករា ដល់ថ្ងៃទី២ ខែ កុម្ភៈ ឆ្នាំ ២០២២។
តាមព័ត៌មានជាបឋម ដែលក្លិបគិរីវង់សុខសែនជ័យ បានបង្ហោះនៅលើផេចហ្វេសប៊ុក បានឱ្យដឹងថា គ្រូបង្វឹកអេស្ប៉ាញនេះ មានអាយុ៤៨ ធ្លាប់មានបទពិសោធជាច្រើន ក្នុងនាមជាគ្រូបង្គោល និងនាយកផ្នែកបច្ចេកទេស ក្នុងបណ្តាប្រទេសជាច្រើន ដូចជាប្រទេសបារ៉ែន ឥណ្ឌា ម៉ុងហ្គាលី និង The United States ជាដើម។
បន្ថែមលើនេះ គាត់ក៏ធ្លាប់ជាអតីតកីឡាករអាជីព ក្នុងក្លិប Real Valladolid C.F. S.A.D ច្រើនជាង៧ឆ្នាំ ហើយក្រៅពីអាជីពជាគ្រូបង្វឹក លោកក៏ជាអ្នកអត្ថាធិប្បាយកម្មវិធីកីឡាបាល់ទាត់តាមវិទ្យុរបស់ LA LIGAផងដែរ៕
