ម្ចាស់អាវលេខ៣១ REIYA KINOSHITA ដែលធ្លាប់ជាអ្នករកគ្រាប់បាល់ដ៏សំខាន់ឱ្យក្រុមគិរីវង់សុខសែនជ័យ សម្រាប់ការប្រកួត កាលពីរដូវកាល ឆ្នាំ២០២១ កន្លងមកនេះ បានក្លាយជាសមាជិកថ្មី របស់ក្រុមកងយោធពលខេមរភូមិ (ទ័ព) វិញម្តងសម្រាប់ការប្រកួតប្រជែង ក្នុងលីគកំពូលកម្ពុជា ឆ្នាំ២០២២នេះ។
ក្រុមមានមូលដ្ឋាននៅស្តាតចាស់ ទ័ព បានប្រកាសពីការចុះកិច្ចសន្យាជាមួយខ្សែបម្រើ REIYA KINOSHITA នៅថ្ងៃអង្គារនេះ ហើយតាមរយៈការប្រកួតនេះ REIYA KINOSHITA បានក្លាយជាកីឡាករបរទេសទី៥ចុងក្រោយ របស់ក្រុមទ័ព សម្រាប់ត្រៀមការប្រកួត នៅរដូវកាលថ្មីនេះ។
ជាមួយការនាំយក REIYA KINOSHITA មកកាន់កីឡដ្ឋានស្តាតចាស់នេះដែរ បានបង្ហាញថា ក្រុមទ័ព នៅរដូវកាលនេះ បានយកកីឡាករជនជាតិជប៉ុនរហូតដល់៣នាក់ សម្រាប់លេងនៅរដូវកាលនេះ ព្រោះខ្សែប្រយុទ្ធពាក់លេខ១០ កំពុងបង្ហាញទម្រង់លេងល្អ TAKUMU Nishihara ក៏បានចុះកិច្ចសន្យាលេងឱ្យទ័ព ហើយនិងកីឡាករជប៉ុនពាក់លេខ១៣ Yuta Kikuchi ក៏បានបន្តកុងត្រាថ្មី លេងឱ្យក្រុមមួយនេះ ផងដែរ។
ចំណែកកីឡាករបរទេស២នាក់ទៀត គឺកីឡាករ ធ្លាប់មានបទពិសោធលេងនៅលីគកំពូលថៃ លីគកំពូលបង់ក្លាដែស និងលីគនៅប្រទេសហ្គាណា DICKO IBRAHIM ABOU ដែលជាជនជាតិកូតឌីវ័រ មានវ័យ២៣ឆ្នាំ និងខ្សែការពារសញ្ជាតិអេហ្ស៊ីប ELSAYED MAHMOUN។
សម្រាប់ ELSAYED MAHMOUN, DICKO IBRAHIM ABOU ព្រមទាំង TAKUMU Nishihara និង Yuta Kikuchi ធ្លាប់បានលេងជាមួយគ្នាហើយ នៅពេលក្រុមទ័ព ទទួលបានលេខ២ ក្នុងការប្រកួតពានបើករដូវកាល ដែលរៀបចំដោយក្លិបវិសាខា កាលពីពេលថ្មីៗនេះ ហើយតាមរយៈការប្រកួតនោះ ត្រូវបានគេមើលឃើញថា អ្នកទាំង៤នេះ បង្ហាញទម្រង់លេងបានល្អ ជាពិសេស TAKUMU Nishihara ដែលមានភាពមុតស្រួច នៅតំបន់ប្រយុទ្ធ ខណៈ ELSAYED MAHMOUN បានក្លាយជារនាំងយ៉ាងរឹងមាំ នៅតំបន់ការពារ ដែលអាចនិយាយបានថា ទ័ព នៅឆ្នាំនេះ រៀបចំក្រុមបានល្អ ហើយក្រុមមួយនេះ ក៏មានមហិច្ឆតា ដណ្តើមយកពាន នៅរដូវកាលនេះ ផងដែរ៕