បរទេស៖ Diogo Jota បានជួយឲ្យក្រុម Liverpool ឈានទៅក្រុម Chelsea ក្នុងវគ្គផ្តាច់ព្រ័ត្រនៃពាន League Cup ខណៈដែលគ្រាប់បាល់ស៊ុតបញ្ចូលទី២គ្រាប់របស់ខ្សែប្រយុទ្ធអន្តរជាតិព័រទុយហ្គាល់រូបនេះ បានជួយឲ្យក្រុមខ្លួនដណ្តើមបានជ័យជម្នះក្នុងលទ្ធផល ២-០ នៅលើទឹកដីក្រុម Arsenal ក្នុងការប្រកួតវគ្គពាក់កណ្តាលផ្តាច់ព្រ័ត្រ ជើងទី២កាលពីថ្ងៃព្រហស្បតិ៍។
Jota បានជួយឲ្យ Liverpool ស្ថិតលើផ្លូវឆ្ពោះទៅកាន់ការប្រកួតនាកីឡដ្ឋាន Wembley តាមរយៈគ្រាប់បាល់បញ្ចូលទីរបស់គេនៅតង់ទី១ ហើយរូបគេបានបញ្ចប់ការសង្ស័យផ្សេងៗតាមរយៈការបន្ថែម១គ្រាប់ទៀតនៅជិតបញ្ចប់ការប្រកួតក្នុងតង់ទី២។ ក្រុមរបស់លោក Jurgen Klopp នឹងត្រូវប៉ះជាមួយនឹងក្រុម Chelsea ក្នុងវគ្គផ្តាច់ព្រ័ត្រ នៅថ្ងៃទី២៧ ខែកុម្ភៈ ខាងមុខ។ គ្រាប់បាល់ទី១៣ និងទី១៤របស់ Jota នៅរដូវកាលនេះ បានបង្ហាញពីតម្លៃរបស់គេចំពេលដ៏សំខាន់ ស្របពេលដែល Liverpool បានអវត្តមានតារាឆ្នើម Mohamed Salah និង Sadio Mane ដោយសារតែពួកគេត្រូវបំពេញតាតព្វកិច្ចក្នុងយុទ្ធនាការ African Cup of Nations។
ក្រុមហង្សក្រហមមួយនេះ ដែលបានលើកពាន League Cup ក្នុងឆ្នាំ២០១២ ឈានទៅប្រកួតវគ្គផ្តាច់ព្រ័ត្រ ជាលើកដំបូង បើគិតចាប់តាំងពីឆ្នាំ២០១៦ ខណៈដែលពួកគេសមឹ្លងរកការឈ្នះពាននេះជាលើកទី៩។ លោក Klopp បានឲ្យដឹងថា៖ «យើងបានស៊ុតបាល់បញ្ចូលទី២គ្រាប់ដ៏អស្ចារ្យ ហើយ Diogo Jota បានលេងយ៉ាងល្អ។ រូបគេបានក្លាយជាខ្សែប្រយុទ្ធលំដាប់ពិភពលោកហើយ»៕
ប្រភពព័ត៌មាន៖ Channel News Asia
