បរទេស៖ គ្រូបង្វឹកអ៊ីតាលីលោក Roberto Mancini បានដាក់បញ្ចូលខ្សែប្រយុទ្ធ Mario Balotelli នៅក្នុងក្រុមឈុតធំទាំង ៣៥ នាក់ សម្រាប់ជំរុំហ្វឹកហាត់ដែលនិងចាប់ផ្តើមនៅចន្លោះថ្ងៃទី២៦ ដល់ ២៨ ខែមករា ដើម្បីត្រៀមសម្រាប់ការប្រកួតជម្រុះ World Cup ឆ្នាំ ២០២២ របស់ពួកគេជាមួយក្រុម North Macedonia ក្នុងខែមីនា។
ខ្សែប្រយុទ្ធវ័យ៣១ ឆ្នាំរូបនេះនៅតែបង្ហាញសមត្ថភាពសម្រាប់ Adana Demirspor នៅលីកកំពូល តួកគីក្នុងរដូវកាលនេះ ដោយស៊ុតបញ្ចូលទីបានប្រាំបួនគ្រាប់ និងបញ្ជូនបាល់ឱ្យមិត្តរួមក្រុមបញ្ចប់ទី ប្រាំដងក្នុងការបង្ហាញខ្លួនគ្រប់ក្របខណ្ឌប្រកួត ប្រកួតសរុប២១ដង។ Balotelli ដែលធ្លាប់ធ្វើការរួមគ្នាជាមួយលោក Mancini នៅ Inter Milan និង Man. City នឹងចូលរួមជាមួយក្រុមជើងឯកទ្វីបអឺរ៉ុបជាលើកដំបូងក្រោយអវត្តមាន៣ ឆ្នាំកន្លះ ខណៈការបង្ហាញខ្លួនចុងក្រោយរបស់គេគឺនៅក្នុងខែកញ្ញា ២០១៨ ពេលអ៊ីតាលីប្រកួតស្មើ ១-១ ជាមួយប៉ូឡូញក្នុងការប្រកួត Nations League ។
លោកMancini ក៏បានរួមបញ្ចូលកីឡាករដែលមិនបានលេងចំនួនប្រាំពីរនាក់ផងដែរគឺអ្នកចាំទី Marco Carnesecchi ខ្សែការពារ Luiz Felipe និង Giorgio Scalvini ខ្សែបម្រើ Davide Frattesi, Nicolo Fagioli និង Samuele Ricci និងខ្សែប្រយុទ្ធ Joao Pedro។ខណៈអវត្តមានគួរឱ្យកត់សម្គាល់ពីក្រុមអ៊ីតាលីរួមមាន Gianluigi Donnarumma, Leonardo Bonucci, Jorginho, Marco Veratti និង Federico Chiesa៕
ប្រភពព័ត៍មាន៖ Sportsmole
