បរទេស៖ លោក Gianni Infantino ប្រធានសហព័ន្ធកីឡាបាល់ទាត់អន្តរជាតិហៅកាត់ថា FIFA បានបង្កឲ្យមានការរិះគន់យ៉ាងខ្លាំង កាលពីថ្ងៃពុធ នៅពេលដែលលោកបាននិយាយថា ការកើនឡើងប្រាក់ចំណូលពីព្រឹត្តិការណ៍ World Cup ២ឆ្នាំម្តង អាចបង្កើតឱកាសជាច្រើនសម្រាប់ពលរដ្ឋអាមេរិក ដែលអាចនឹងស្លាប់ក្នុងសមុទ្រ ពេលព្យាយាមឆ្លងកាត់មហាសមុទ្រមេឌីទែរណេ។
ក្រោយមក ប្រធាន FIFA រូបនេះ បាននិយាយថា ការថ្លែងសុន្ទរកថារបស់លោកទៅកាន់ក្រុមប្រឹក្សាអឺរ៉ុប ដែលជាអង្គការសិទ្ធិមនុស្សឈានមុខគេប្រចាំទ្វីបនេះ ត្រូវបាន «គេយកទៅបកស្រាយខុស» ហើយថា លោកមានន័យថា កីឡាបាល់ទាត់ «អាចជួយឲ្យស្ថានភាពរបស់ប្រជាពលរដ្ឋទូទាំងពិភពលោក កាន់តែល្អប្រសើរ»។
គោលគំនិតនៃការៀបចំ World Cup រៀងរាល់២ឆ្នាំម្តង បានក្លាយជាគោលដៅដ៏ចម្រងរបស់លោក Infantino ដែលកំពុងតែព្យាយាមស្វែងរកការគាំទ្រពីសហព័ន្ធជាតិនានា ដោយលោកបានលើកឡើងថា ការរៀបចំបែបនេះ អាចជួយបង្កើនប្រាក់ចំណូលរហូតដល់ទៅ៤,៤ពាន់លានដុល្លារអាមេរិក សម្រាប់អង្គភាពពិភពលោកមួយនេះ។ FIFA បានបញ្ជាក់ថា មូលនិធិបន្ថែមនេះ នឹងជួយកាត់បន្ថយគម្លាតប្រាក់ចំណូល រវាងទីផ្សារបាល់ទាត់ដែលមានការអភិវឌ្ឍ និងទីផ្សារដែលមានការអភិវឌ្ឍតិចតួច៕
ប្រភពព័ត៌មាន៖ Reuters
