សហព័ន្ធកីឡាបាល់ទាត់កម្ពុជា (FFC) កាលពីព្រឹកថ្ងៃអង្គារនេះ បានបង្ហោះសារសុំទោស ទៅដល់អ្នកគាំទ្រ ដែលបានចូលរួមទស្សនាផ្ទាល់ នៅក្នុងការប្រកួតបើកឆាកពានរង្វាន់ AFF U23 Championship 2022 នៅពហុកីឡដ្ឋានជាតិមរតតេជោ កាលពីថ្ងៃចន្ទ ម្សិលមិញ។
ការប្រកាសសុំទោសជាធារណៈនេះ គឺដើម្បីឆ្លើយតបទៅនឹងការរិះគន់បែបស្ថាបនារបស់អ្នកគាំទ្រភាគច្រើន ដែលបានរអ៊ូរទាំ ទាំងទៅលើការរកកន្លែងអង្គរ ទៅតាមប្រភេទ និងវិធានសុខាភិបាល ជាពិសេសគឺកន្លែងដាក់យានជំនិះ ព្រោះមានការលើកឡើងថា គ្រាន់តែរង់ចាំការយកយានចេញពីកន្លែងផ្ញើ ត្រូវចំណាយពេលពី១ ទៅជាង២ម៉ោង។
អ្នកថតរូបជើងចាស់ លោក គឹម សុវណ្ណា បានបង្ហោះរូបភាព៣សន្លឹក បង្ហាញពីអ្នកទស្សនា នៅក្នុងពហុកីឡដ្ឋានថ្មី និងទិដ្ឋភាពពេលអ្នកទស្សនាទាំងនោះ កកស្ទះនៅកន្លែងផ្ញើយានជំនិះ ហើយបានសរសេរថា៖ «សង្ឃឹមថា ប្រកួតក្រោយ ខាងពហុកីឡដ្ឋាន និងមានវិធានការថ្មី សម្រាប់ចាត់ចែងលើយានជំនិះ!និយាយឱ្យត្រង់ ក្រោយការប្រកួតចប់ ខ្ញុំត្រូវរង់ចាំ ២ម៉ោងកន្លះ ដើម្បីយកម៉ូតូចេញបាន!»។
យ៉ាងណាក៏ដោយ ចំពោះចំណុចខ្វះខាតទាំងនោះ FFC បានធ្វើការសុំទោស ដោយបានសរសេរបង្ហោះ នៅលើផេចហ្វេសប៊ុកផ្លូវការរបស់ខ្លួនថា៖ «ក្រុមការងារសហព័ន្ធកីឡាបាល់ទាត់កម្ពុជា សុំអភ័យទោស សម្រាប់ការខ្វះខាត ក្នុងការរៀបចំព្រឹត្តិការណ៍ AFF U23 Championship 2022 នៅពហុកីឡដ្ឋានមរតកតេជោ។ នេះជាលើកទី ១សម្រាប់ក្រុមការងាររបស់យើងនៅពហុកីឡដ្ឋានដ៏ធំនេះ»។
FFC បានបន្ថែមថា៖ «ផ្អែកលើបទពិសោធនៃថ្ងៃដំបូង ក្រុមការងារបានកំណត់ចំណុចខ្វះខាត និងដាក់ជាផែនការថ្មី ក្នុងការរៀបចំព្រឹត្តិការណ៍នេះ ដើម្បីឱ្យមានភាពរលូនជាងថ្ងៃដំបូង ដែលយើងបានឆ្លងកាត់សម្រាប់បងប្អូន អាចចូលរួមជាមួយនឹងភាពងាយស្រួល នៅខាងក្នុង ទី1 កន្លែងចតរថយន្តនិងម៉ូតូ ទី២ វិធានការសុខាភិបាល និងទី៣ ការណែនាំនិងលំហូរចូលតំបន់អង្គុយ។ សូមអរគុណ ចំពោះការយោគយល់របស់បងប្អូនយើង!»៕
