ក្លិបមានមូលដ្ឋាន នៅខេត្តសៀមរាប អង្គរថាយហ្គឺរ បានផ្លាស់ប្តូរនូវរបត់ដ៏ទំនើបបំផុត មិនធ្លាប់មាននៅកម្ពុជា គឺការដាក់ឱ្យប្រើសំបុត្រអេឡិចត្រូនិច ដែលផ្ទៀងផ្ទាត់សំបុត្រដោយការស្កេន QR Code ឬ ខ្សែដៃវៃឆ្លាត ជំនួសការប្រើសំបុត្រធ្វើពីក្រដាស សម្រាប់អ្នកទស្សនារបស់ខ្លួន នៅកីឡដ្ឋានហនុមាន។
«បន្ទាប់ពីធ្វើកិច្ចពិភាក្សារវាង Angkor Tiger Football Club និង Wonderpass ពួកយើងបានផ្ដល់នូវដំណោះស្រាយដ៏សមស្របមួយសម្រាប់ទស្សនិកជន និង អ្នកប្រើប្រាស់។ ជំនួសដោយការប្រើប្រាស់ក្រដាសសំបុត្រ Angkor Tiger Football Club សម្រេចយកការប្រើប្រាស់សំបុត្រអេឡិចត្រូនិច ដែលផ្ទៀងផ្ទាត់សំបុត្រដោយការស្កេន QR Code ឬ ខ្សែដៃវៃឆ្លាត»។ នេះជាសេចក្តីប្រកាសរបស់ក្លិបអង្គរថាយហ្គឺរ កាលពីថ្ងៃពុធ ជុំវិញការផ្លាស់ប្តូរ មកប្រើសំបុត្រអេឡិចត្រូនិចនេះ។
អង្គរថាយហ្គឺរ បានបន្ថែមថា៖ «ការប្រើ ប្រាស់សំបុត្រអេឡិចត្រូនិចនេះ គឺបានចូលរួមចំណែកជួយទៅដល់បរិស្ថាន និង ផ្ដល់អត្ថប្រយោជន៍ជាច្រើនទៅដល់អ្នកប្រើប្រាស់ ព្រោះថាខ្សែដៃវៃឆ្លាត គឺអាចប្រើប្រាស់ឡើងវិញ ដែលមិនមែនត្រឹមតែជួយកាត់បន្ថយលើការប្រើប្រាស់ក្រដាសសំបុត្រមួយមុខតែប៉ុណ្ណោះនោះទេ ប៉ុន្តែថែមទាំងចំណេញពេលវេលា និង ផ្ដល់ជាភាពងាយស្រួលទៅកាន់អ្នកប្រើប្រាស់ ដោយមានបន្ថែមនូវមុខងារពិសេសៗ អាចផ្ទុកឯកសារអ្នកប្រើប្រាស់បាន ដូចជាកាតចាក់វ៉ាក់សាំង ប៉ាស្ព័រ និង ឯកសារផ្សេងៗ ថែមទៀតផង»។
ជាមួយគ្នានេះ ក្លិបអង្គរថាយហ្គឺរ បានអះអាងថា ការកិច្ចព្រមព្រៀងសហប្រតិបត្តិការជាមួយ Wonderpass នោពេលនេះ គឺមានគោលបំណងលើកកម្ពស់ការអភិវឌ្ឍបច្ចេកវិទ្យា ក្នុងវិស័យបាល់ទាត់នៅកម្ពុជា។
យ៉ាងណាក៏ដោយ សម្រាប់ការស្វាគមន៍ក្រុមភ្នំពេញក្រោន នៅកីឡដ្ឋានហនុមាន នាថ្ងៃសៅរ៍នេះ អង្គរថាយថាយហ្គឺរ នៅមិនទាន់បានដាក់ឱ្យប្រើប្រភេទសំបុត្រអេឡិចត្រូនិច នៅឡើយទេ គឺក្លិបនេះ បន្តប្រើសំបុត្រជាក្រដាស ដដែល ហើយអង្គរថាយហ្គឺរ ក៏នៅមិនទាន់បានបង្ហាញពីទម្រង់ ឬរូបភាពនៃសំបុត្រអេឡិចត្រូនិច នៅឡើយទេ គិតត្រឹមពេលនេះ ខណៈការប្រកួត២លើកជាមួយក្រុមវិសាខា និងគិរីវង់សុខសែនជ័យ កន្លងមកនេះ កីឡដ្ឋានហនុមាន មានអ្នកគាំទ្រច្រើនជាងគេ ចំណែកតម្លៃសំបុត្រ មាន៣ប្រភេទ គឺប្រភេទ A តម្លៃ ១០០០០រៀល ប្រភេទ B តម្លៃ ៦០០០រៀល និងសំបុត្រប្រភេទ C តម្លៃ ៤០០០រៀល៕
