ឆាកប្រយុទ្ធដ៏កក្រើក ដែលមិនធ្លាប់មាន នៅកម្ពុជា នឹងត្រូវធ្វើឡើង នៅលើទឹកដីអង្គរ ខេត្តសៀមរាប នាថ្ងៃទី១០ ខែមេសា ខាងមុខនេះ នោះគឺព្រឹត្តិការណ៍ «ស្តេចប្រដាល់អង្គរ ជាលើកទី ឬ 1st Angkor King Fight»។
ព្រឹត្តិការណ៍ខ្នាតយក្ស ស្តេចប្រដាល់អង្គរ ជាលើកដំបូងនេះ វាជាជំនួបរវាងជើងខ្លាំង លំដាប់ស្រុកខ្មែរ រហូតដល់១០នាក់ ជាមួយអ្នកប្រដាល់លំដាប់កំពូលៗរបស់ប្រទេសចិន ដែលអ្នកទាំងនេះ បានត្រៀមខ្លួនរួចហើយ ដើម្បីប្រកួតគ្នា ចំណែកសំបុត្រទស្សនា ក៏បានដាក់លក់ហើយដែរ។
សម្រាប់ជើងខ្លាំងលំដាប់កំពូលៗរបស់កម្ពុជា ដែលត្រូវបានសម្រិតសម្រិតជាមួយអ្នកប្រយុទ្ធចិន នៅលើទឹកដីអង្គរ ជាលើកដំបូងនេះ រួមមាន ផល សោភ័ណ្ឌ, ព្រំ សំណាង, ឈឿន ល្វៃ, ឡៅ ចិន្ទ្រា, ឡុង ប៊ុនលឿន, ឡៅ ចិត្ត្រា, សូត្រ វាសនា, ឈុត សេរីវ៉ាន់ថង, វ៉ាន់ វឿន និង កីឡាការិនី នូវ ស្រីពៅ ហើយអ្នកទាំងនេះ សុទ្ធតែប្រកួតជាមួយកីឡាករ កីឡាការិនីចិនដូចគ្នា ទាំងអស់។
នៅក្នុងការប្រកួតទាំង១០គូនេះ ការជួបគ្នារវាងជើងខ្លាំង ផល សោភ័ណ្ឌ និងអ្នកប្រយុទ្ធរបស់ចិន Wei Rui ក្នុងទម្ងន់៦៥គីឡូក្រាម ត្រូវបានចាត់ទុកថា ជាជំនួបគូឯក ដែលមានភាពទាក់ទាញខ្លាំងជាងគេ ព្រោះកីឡាករចិនម្នាក់នេះ ជាកំពូលអ្នកប្រយុទ្ធ ដែលកំពុងមានភាពល្បីល្បាញខ្លាំង ដោយគរបានផ្តួលគូប្រកួតឱ្យសន្លប់ជាច្រើននាក់ ជាមួយក្បាច់សន្លប់ដ៏សម្បូរបែប ហើយសូម្បីតែ ផល សោភ័ណ្ឌ ក៏ពិបាកគេចផុត ពីស្ថានភាពគ្រោះថ្នាក់នេះ នោះដែរ។
សម្រាប់បេក្ខភាពជាអ្នកប្រយុទ្ធរបស់កម្ពុជា ចំនួន៩នាក់ទៀត ក៏ត្រូវបានផ្គូផ្គងជាមួយកីឡាករ កីឡាការិនីរបស់ចិន រួចរាល់ហើយដែរ គឺរង់ចាំតែថ្ងៃប្រកួតមកដល់ប៉ុណ្ណោះ ហើយសន្និសីទស្តីពីការប្រកួត «ស្តេចប្រដាល់អង្គរ ជាលើកទី១» នេះ នឹងត្រូវធ្វើនៅទីស្នាក់ការគណៈកម្មាធិការជាតិអូឡាំពិកកម្ពុជា នាព្រឹកម៉ោង១០ ថ្ងៃសុក្រ ស្អែកនេះ៕
