បរទេស៖ លោក Diego Simeone បានអំពាវនាវដល់ក្រុមអ្នករិះគន់លើទម្រង់លេងរបស់ក្រុម Atletico Madrid បង្ហាញពីការគោរពបន្ថែមទៀត នៅមុនពេលការប្រកួតជើងទី២ក្នុងក្របខ័ណ្ឌ Champions League វគ្គ៨ក្រុមចុងក្រោយរបស់ពួកគេ ជាមួយនឹងក្រុម Manchester City នៅរាត្រីនេះ។
ក្រុម Atletico បានរងនូវការរិះគន់ចំៗចំពោះទម្រង់លេងដែលផ្តោតតែលើតំបន់ការពាររបស់ពួកគេ នាកីឡដ្ឋាន Etihad កាលពីសប្តាហ៍មុន ដែលនៅពេលនោះក្រុមរបស់លោក Simeone មិនមានឱកាសសូម្បីតែស៊ុតបាល់សំដៅទី១លើក ខណៈដែល Man City បានកត់ត្រាជ័យជម្នះក្នុងលទ្ធផល ១-០។ លោក Simeone បាននិយាយក្នុងសន្និសីទសារព័ត៌មានមួយកាលពីថ្ងៃអង្គារថា៖ «ចាប់តាំងពីខ្ញុំបានចាប់ផ្តើមធ្វើជាគ្រូបង្វឹកក្នុងឆ្នាំ២០០៥ ប្រសិនបើខ្ញុំនិយាយមិនខុសទេគឺថា ខ្ញុំមិនធ្លាប់រិះគន់គ្រូបង្វឹកដូចគ្នាឡើយ។ ខ្ញុំមិនធ្លាប់ឡើយ។
ខ្ញុំជឿជាក់ថា មានរបៀបលេងខុសគ្នាជាច្រើន ដើម្បីទទួលបានលទ្ធផលដែលអ្នកចង់បានពីការប្រកួតនីមួយៗ ប៉ុន្តែ ពេលក្រប់គ្នា រិះគន់គ្រូបង្វឹកដូចគ្នា ខ្ញុំមិនចូលរួមឡើយ។ ដូចដែលឪពុកខ្ញុំបាននិយាយអ៊ីចឹង ពាក្យសម្តីអាចសម្លាប់មនុស្សបាន។ មានរបៀបលេងជាច្រើនក្នុងការលេង ខ្ញុំជ្រើសរើសយករបៀបលេងមួយ ប៉ុន្តែ អ្នកត្រូវតែគោរពសហការីរបស់អ្នក»៕
ប្រភពព័ត៌មាន៖ Channel News Asia
