បរទេស៖ ក្រុមហង្សក្រហម Liverpool បានកាត់បន្ថយគម្លាតតាមពីក្រោយក្រុម Manchester City នៅលើកំពូលតារាងនៃក្របខ័ណ្ឌ Premier League មកនៅត្រឹម១ពិន្ទុ ខណៈដែលក្រុមកំពុងប្រមាញ់ពានចំនួន៤មួយនេះ បានធ្វើឲ្យក្រុម Everton ធ្លាក់ក្បែរតំបន់កាត់ចោល តាមរយៈការយកឈ្នះក្នុងលទ្ធផល ២-០។
ស្របពេលជាមួយគ្នានេះ ក្រុម Chelsea បានផ្តួលក្រុម West Ham ក្នុងលទ្ធផល ១-០ ដើម្បីបន្ថយភាពតានតឹងលើការប្រជែងចំណាត់ថ្នាក់កំពូលទាំង៤កាលពីថ្ងៃអាទិត្យ។ ក្រុមរបស់លោក Jurgen Klopp តម្រូវឲ្យធ្វើការងារធ្ងន់ ដើម្បីបំបែកតំបន់ការពាររបស់ក្រុម Everton ក្នុងការប្រកួតរវាងក្រុមស្ថិតក្នុងតំបន់ Merseyside តែមួយ នាកីឡដ្ឋាន Anfield។ ពួកគេមិនអាចរកឱកាសក្នុងការស៊ុតបាល់ឲ្យចំទីសូម្បីតែ១លើក នៅមុនពេលខ្សែការពារសញ្ជាតិស្កុតឡេន Andrew Robertson បានតែតបាល់បំប៉ោងសំណាញ់ទី នៅតង់ទី២។
គ្រាប់បាល់ស៊ុតបញ្ចូលទីនៅជិតបញ្ចប់ការប្រកួតរបស់ Divock Origi បានធានាថា Liverpool នៅតែបន្តដាក់សម្ពាធលើក្រុមការពារជើងឯក Man City ដែលបានលត់ក្រុម Watford យ៉ាងចាស់ដៃក្នុងលទ្ធផល ៥-១ កាលពីថ្ងៃសៅរ៍ ដើម្បីនាំមុខ៤ពិន្ទុដាច់លើកំពូលតារាងជាបណ្តោះអាសន្ន។ ស្របពេលដែលនៅសល់៥ប្រកួតទៀតសម្រាប់ទាំងក្រុម Liverpool និង Man City ការប្រជែងដណ្តើមពានទំនងដូចជាត្រូវកាត់សេចក្តីរហូតដល់ការប្រកួតចុងក្រោយ៕
ប្រភពព័ត៌មាន៖ Channel News Asia