បរទេស៖ ខ្សែប្រយុទ្ធ Son Heung-min របស់ក្លិប Tottenham បានបញ្ជាក់ថា រូបគេ «បានទទួលយក» ការសម្រេចចិត្តរបស់លោក Antonio Conte ដើម្បីប្តូររូបគេចេញ ក្នុងពេលក្រុមខ្លួនបានយកឈ្នះលើក្រុម Arsenal ក្នុងលទ្ធផល ៣-០ កាលពីថ្ងៃព្រហស្បតិ៍ បើទោះបីរូបគេបានបញ្ចេញប្រតិកម្មយ៉ាងខឹងសម្បារ ចំពោះការសម្រេចចិត្តនេះក៏ដោយ។
Son បានរកគ្រាប់បាល់ទី៣របស់ក្រុម Tottenham ក្នុងតង់ទី២ ខណៈដែលក្រុមរបស់លោក Conte បានយកឈ្នះគូប្រកួតក្នុងតំបន់ទីក្រុងឡុងដ៍ភាគខាងជើងរបស់ពួកគេ ដើម្បីរក្សារក្សាក្តីសង្ឃឹមនៃការប្រជែងយកចំណាត់ថ្នាក់លេខ៤ នៅលើតារាងក្របខ័ណ្ឌ Premier League។ ស្របពេលដែល Son កំពុងតែដេញតាមពីក្រោយ Salah នៅលើតារាងអ្នករករគ្រាប់បាល់បានច្រើនជាងគេក្នុងក្របខ័ណ្ឌ Premier League តារាឆ្នើមអន្តរជាតិកូរ៉េខាងត្បូងរូបនេះ ទំនងដូចជា ខកចិត្ត នៅពេលដែលរូបគេត្រូវបានប្តូរចេញនៅនាទី ទី៧២។ Son ដែលបានជួយបង្កើតឲ្យមានបាល់ប៉េណាល់ទី និងត្រូវបានស៊ុតដោយកីឡាករ Harry Kane ដើម្បីរកគ្រាប់បាល់បើកឆាកឲ្យ Tottenham នោះ កំពុងមានគ្រាប់បាល់សរុបចំនួន២១គ្រាប់ ហើយ Salah របស់ Liverpool មាន២២គ្រាប់។
ពិតណាស់ លោក Conte បានព្យាយាមរក្សាទុក Son ដើម្បីធ្វើឲ្យរូបគេមានភាពរឹងមាំជានិច្ចសម្រាប់ការប្រកួតជាមួយនឹង Burnley នៅថ្ងៃអាទិត្យ ស្របពេលដែលក្រុម Arsenal ដែលនៅសល់សមាជិក១០នាក់ មិនមានសង្ឃឹមក្នុងការតាមស្មើវិញបានឡើយ ក្រោយពីកីឡាករ Rob Holding បានរងពិន័យកាតក្រហមនៅតង់ទី១។ Son បានប្រាប់ទូរទស្សន៍ Sky Sports ថា៖ «ពិតណាស់ ខ្ញុំចង់លេងជានិច្ច ប៉ុន្តែ ខ្ញុំអាចនិយាយអ្វីបាន? ខ្ញុំត្រូវតែទទួលយកការសម្រេចចិត្តនេះ»៕
ប្រភពព័ត៌មាន៖ Channel News Asia
