ក្រុមតារាកីឡាអេឡិចត្រូនិកកម្ពុជា ឈ្មោះថា «ស្មោះស្នេហ៍» បានរួមគ្នាបង្ហាញសមត្ថភាពយ៉ាងល្អ ដើម្បីប្រកួតប្រជែង ក្នុងព្រឹត្តិការណ៍ប្រកួតកីឡាអេឡិចត្រូនិកអន្តរជាតិ All-Star Showdown 2022 សម្រាប់វិញ្ញាសា Mobile Legends Bang Bang (MLBB) ហើយបានបញ្ចប់ ដោយការទទួលបានចំណាត់ថ្នាក់លេខ៣ បន្ទាប់ពីពួកគេ បានចាញ់ក្រុមមកពីប្រទេសមីយ៉ាន់ម៉ា នៅវគ្គពាក់កណ្តាលផ្តាច់ព្រ័ត្រ។
សម្រាប់ព្រឹត្តិការណ៍ប្រកួត All-Star Showdown 2022 ដែលផ្តោតទៅលើការប្រកួតប្រជែង ដោយទេពកោសល្យនេះ ត្រូវបានរៀបចំឡើងដោយ Moonton នៅចុងបញ្ចប់នៃយុទ្ធនាការ ៥១៥ ដែលសហការរៀបចំដោយ Samsung និងម្ចាស់ឧបត្ថម្ភផ្លូវការ Sting ព្រមទាំងដៃគូ KFC, Ttoy, WOWNOW, Legend, Smart និង Pleng សម្រាប់ដំណាក់កាលទី១ដែលមានតារាចម្រៀង ថេណា ជាអ្នកចាត់ការក្រុម All Star។
តាមរយៈការប្រកួតដំណាក់កាលទី១នេះ ក្រុម ស្មោះស្នេហ៍ (Smos Sne) បានក្លាយជាក្រុមតំណាងឱ្យកម្ពុជា ដែលត្រូវចូលរួមការប្រកួតដំណាក់កាលទី២ ក្នុងព្រឹត្តិការណ៍ All-Star Showdown 2022 បន្ទាប់ពីពួកគេ ទទួលបានជ័យជម្នះ សម្រាប់ការប្រកួតជម្រុះ នៅក្នុងស្រុក ហើយទទួលបានប្រាក់រង្វាន់ចំនួន១៥០០ដុល្លារអាមេរិកនោះ។
ចំពោះការប្រកួតអន្តរជាតិ ដំណាក់កាលទី២ ជាមួយក្រុមផ្សេងៗទៀត មកឥណ្ឌូណេស៊ី សិង្ហបុរី ហ្វីលីពីន ម៉ាឡេស៊ី និងមីយ៉ាន់ម៉ា នេះ ក្រុមស្មោះស្ម័គ្រ របស់កម្ពុជា ដែលស្ថិតនៅពូល B នោះ បានយកឈ្នះក្រុមសិង្ហបុរី Team Skywee ដោយលទ្ធផល ១-០ សម្រាប់ការប្រកួតបើកឆាក រួចបន្តយកឈ្នះក្រុមមីយ៉ាន់ម៉ា Clover ដោយលទ្ធផល ១-០ ដើម្បីឈរលេខ១ ក្នុងពូល នេះ។
យ៉ាងណាក៏ដោយ សម្រាប់ ការឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រ ក្រុមស្មោះស្នេហ៍ ដែលត្រូវជួបក្រុមលេខ២ Clover ដដែលនោះ ចាញ់ដោយក្រុមរបស់ប្រទេសមីយ៉ាន់ម៉ា មួយនេះ ដោយលទ្ធផល ២-១ វិញ ហើយបានត្រឹមចំណាត់ថ្នាក់លេខ៣ អមដោយប្រាក់រង្វាន់បន្ថែមចំនួន ៣៥០០ដុល្លារទៀត។
ចំណែកក្រុម Clover ដែលបានឡើងទៅវគ្គផ្តាច់ព្រ័ត្រនោះ បានទៅចាញ់ក្រុមខ្លាំងមកពីពូល A របស់ឥណ្ឌូនេស៊ី Nevermind ដោយលទ្ធផល ៣-០ ដូច្នេះ ក្រុម Nevermind បានក្លាយជាជើងឯក ខណៈប្រាក់រង្វាន់សរុប ក្នុងព្រឹត្តិការណ៍ All-Star Showdown 2022 នេះ មានចំនួន ២៥០០០ដុល្លារអាមេរិក។
ជាមួយគ្នានេះ អ្នកស្រី Trinity Wu តំណាងផ្នែកទីផ្សារអន្តរជាតិរបស់ MLBB បានថ្លែងថា៖ «ខ្ញុំពិតជារីករាយណាស់ ដែលពិភពនៃកីឡាអេឡិចត្រូនិក និងហ្គេម MLBB ទទួលបានការពេញនិយមខ្លាំងនៅកម្ពុជា ហើយព្រឹត្តិការណ៍លើកនេះ មានការប្រមូលផ្តុំដោយតារាល្បីៗ និងអ្នកនិម័យលេងកីឡាអេឡិចត្រូនិកឈានមុខគេ ចំណែក លីគអេឡិចត្រូនិក MPL ថ្នាក់ជាតិ លើកដំបូង មានក្រុមអាជីព២ដំបូងគេ នៅ MSC ប៉ុន្តែវាមិនទាន់គ្រប់គ្រាន់ទេ បើប្រៀបធៀបនឹងអ្វីដែលចង់នឹងកសាងនាពេលអនាគត»។
អ្នកស្រីបានបន្ថែមថា៖ «ទោះជាការចែករំលែកនៅទីនេះ តិចតួច ក៏យើងខ្ញុំចង់ប្រាប់ទៅសហគមន៍ថា យើងខ្ញុំយកចិត្តទុកដាក់ពីប្រព័ន្ធអេកូឡូស៊ី សម្រាប់កីឡាករអាជីព និងអ្នកចូលចិត្តកីឡាអេឡិចត្រូនិកនៅកម្ពុជា ហើយយើងខ្ញុំចង់ឱ្យមានសកម្មភាពច្រើនថែមទៀត ពីគ្រប់កម្រិត។ យើងខ្ញុំមានគោលបំណង ក្នុងការចាប់ផ្តើមយុគសម័យថ្មី នៃកីឡាអេឡិចត្រូនិកជាមួយគ្នា ដូចអ្វីដែលពាក្យស្លោករបស់ 515 Allstar លើកឡើងថា «យើងខ្ញុំ ល្អជាងខ្ញុំ»។
ចំណែកតំណាងរបស់ Samsung បានបញ្ជាក់ថា៖ «Samsung ពិតជាមានភាពរីករាយក្នុងកិច្ចសហការជាមួយ ALL STAR ដែលនឹងនាំមកនូវបទពិសោធថ្មី ដល់អតិថិជនរបស់ទូរស័ព្ទ Galaxy ជាមួយនឹងការលេងហ្គេមយ៉ាងរលូន។ បទពិសោធនេះ នឹងបង្ហាញយ៉ាងច្បាស់ពីការប្តេជ្ញាចិត្តរបស់សាមសុង ក្នុងការផ្តល់នូវផលិតផល ដែលមានគុណខ្ពស់ទាំងផ្នែកល្បឿនអេក្រង់ និងកម្លាំងថ្ម»៕
