ក្រោយរង់ចាំអស់រយៈពេល១៤ឆ្នាំ នៅទីបំផុត ក្រុមភ្នំពេញហ្គាឡាក់ស៊ី អាចបង្កើតបានកំណត់ត្រាជាប្រវត្តិសាស្រ្ត សម្រាប់ពួកគេបានហើយ បន្ទាប់ពីក្រុមមួយនេះ បានយកឈ្នះក្រុមខេត្តឧត្តរមានជ័យ សម្រាប់ការឡើងមកកាន់វគ្គផ្តាច់ព្រ័ត្រ ជាលើកដំបូង ដើម្បីក្លាយជាម្ចាស់ជើងឯក ការប្រកួតពានរង្វាន់សម្ដេចតេជោ ហ៊ុន សែន (ថ្នាក់ខេត្ត) លើកទី១៦ ឆ្នាំ២០២២។
តាមរយៈការប្រកួតផ្តាច់ព្រ័ត្រ នៅកីឡដ្ឋានខេមបូឌាអ៊ែរវ៉េ កាលពីថ្ងៃសៅរ៍ កន្លងមកនេះ ខ្សែប្រយុទ្ធ ម៉ាត សេតមូស្លីម បានក្លាយជាវីរបុរស ដែលបានជួយឱ្យក្រុមភ្នំពេញហ្គាឡាក់ស៊ី បង្កើតបាននូវកំណត់ត្រាជាប្រវត្តិសាស្រ្ត ចំពោះការឈ្នះពានរង្វាន់សម្ដេចតេជោ ហ៊ុន សែន ថ្នាក់ខេត្ត ជាលើកដំបូងនេះ តាមរយៈការតែតបាល់បញ្ចូលទីរបស់គេ ត្រឹម១គ្រាប់គត់ នៅនាទីទី២ ដើម្បីយកឈ្នះក្រុមខេត្តឧត្តរមានជ័យ ត្រឹម ១-០ យ៉ាងរំភើបបំផុត។
បើតាមលោក លី ពិសិដ្ឋ អ្នកចាត់ការទូទៅក្រុមភ្នំពេញហ្គាឡាក់ស៊ី បានឱ្យដឹងថា ក្រុមរបស់លោក បានរង់ចាំអស់រយៈពេល១៤ឆ្នាំ ទម្រាំអាចឡើងដល់វគ្គផ្ដាច់ព្រ័ត្រ សម្ដេចតេជោ ហ៊ុន សែន (ថ្នាក់ខេត្ត)នេះ ហើយវាក៏ជាលើកដំបូងផងដែរ ដែលក្រុមមួយនេះ បានឈ្នះពាន មួយនេះ។
ជាមួយគ្នានេះ ក្រុមភ្នំពេញហ្គាឡាក់ស៊ី បានបង្ហោះនៅក្នុងផេកហ្វេសប៊ុករបស់ខ្លួន ចំពោះការឈ្នះពានរង្វាន់ថ្នាក់ខេត្តនេះថា៖ «កម្លាំងសាមគ្គី គឺជាគុណតម្លៃ នៃភាពជោគជ័យ ហើយពេលនេះក្រុមយើងអាចសាងប្រវត្តិសាស្រ្តសម្រាប់ក្រុមមួយនេះ ក្នុងសករាជថ្មី នៃ Sporting Galaxy បានហើយ។ ជ័យយោ ម្ចាស់ជើងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៦ រដូវកាលឆ្នាំ២០២២ ហើយក៏សូមចូលរួមអបអរសាទរផងដែរ ដែលក្រុមយើង បានកក់កៅអីឡើងទៅប្រកួតពានរង្វាន់សម្តេចតេជោ កម្រិត league2 បន្តទៀត ដោយ ភ្នំពេញហ្គាឡាក់ស៊ី ត្រូវជួបក្រុមអាស៊ីអឺរ៉ុប នៅថ្ងៃទី២១ ខែមិថុនា ខាងមុខនេះ»។
សម្រាប់ការឈ្នះពានរង្វាន់សម្តេច ហ៊ុន សែន ថ្នាក់ខេត្ត ជាលើកដំបូងនេះ ក្រុមភ្នំពេញហ្គាឡាក់ស៊ី ទទួលបានប្រាក់រង្វាន់ចំនួន១៧លានរៀល ហើយជាមួយគ្នានេះ គ្រូបង្គោលក្រុមភ្នំពេញហ្គាឡាក់ស៊ី ក៏ទទួលបានពាន ក្នុងនាមជាគ្រូបង្វឹកល្អជាងគេ ចំណែក ស៊ុប អះម៉ាត់ បានពានជាអ្នកចាំទីល្អ ដោយអ្នកទាំង២នេះ បានប្រាប់រង្វាន់លើកទឹកចិត្ត ក្នុងម្នាក់ ១,៦លានរៀលដូចគ្នា។
ចំណែកក្រុមលេខ២ ខេត្តឧត្តរមានជ័យ បានទទួលប្រាក់រង្វាន់ ៨,៥លានរៀល ហើយក្រុមឬទ្ធីសែន ដែលបានយកឈ្នះក្រុមកំពតអេហ្វស៊ី ២-០ ដើម្បីទទួលបានចំណាត់ថ្នាក់លេខ៣នោះ បានប្រាក់រង្វាន់ចំនួន៦លានរៀល ចំណែកម្ចាស់ស្បែកជើងមាស បានទៅលើកីឡាករ អ៊ុង វិសាល របស់ក្រុមខេត្តស្វាយរៀង ដោយរកបានគ្រាប់បាល់ច្រើនជាងគេ គឺ១៧គ្រាប់ ប្រចាំព្រឹត្តិការណ៍នេះ ហើយគេក៏ទទួលបានប្រាក់រង្វាន់ចំនួន ១,៦លានរៀលដែរ៕
