ប្រធានក្រុមរបស់ភ្នំពេញក្រោន ជួន ចាន់ចាវ បានប្រើវិហារស័ព្ទដ៏មុតស្រួច ដើម្បីចាក់ទម្លុះ ទៅដល់ការចោទសួររបស់អ្នកកាសែតវៀតណាម បន្ទាប់ពីក្រុមរបស់ខ្លួន បានចាញ់ផ្ទះវៀតណាម Viettel FC ក្នុងការប្រកួតជម្រុះលើកទី២ ប្រចាំពូលI នៃពានរង្វាន់ AFC Cup 2022 កាលពីយប់ថ្ងៃចន្ទ។
នៅក្រោយការប្រកួត កាលពីយប់មិញនោះ អ្នកសារព័ត៌មានរបស់វៀតណាម បានសួរទៅកាន់ ជួន ចាន់ចាវ ថា Viettel FC ជាក្រុមខ្លាំងជាងគេក្នុងពូល អ៊ីចឹងតើ ភ្នំពេញក្រោន ទទួលបានបទពិសោធអ្វីខ្លះ ពីការប្រកួតនេះ? ហើយចំពោះសំនួរនេះ ជួន ចាន់ចាវ បានឆ្លើយតបថា៖ «Viettel FC មិនមែនជាក្រុមខ្លាំងទេ! ខ្ញុំគិតថា ក្រុមយើង ជាក្រុមខ្លាំងជាងគេ ក្នុងពូលនេះ។ យើងលេងល្អ យើងគ្រប់គ្រងការប្រកួត យើងខ្វះតែការរកគ្រាប់បាល់ប៉ុណ្ណោះ»។
តាមរយៈការប្រកួត កាលពីម្សិលមិញនោះ ក្រុម Voiettel FC របស់វៀតណាម រកបានត្រឹម១គ្រាប់គត់ ពីការស៊ុតបាល់ពីចម្ងាយរបស់កីឡាករពាក់លេខ៨៨ Bùi Duy Thường នៅនាទីទី៩ ហើយ ភ្នំពេញក្រោន ក៏បានព្យាយាមបង្កើតឱកាស បានច្រើនផងដែរ តែមិនអាចរកបានគ្រាប់បាល់បាន។
ការចាញ់ក្រុម Viettel ១-០ នេះ វាបានក្លាយជាការសោកស្តាយ លើកទី២ សម្រាប់ភ្នំពេញក្រោន ហើយការចាញ់ក្រុម Houngang United កាលពីថ្ងៃទី២៤ ខែមិថុនា កន្លងមកនេះ ក៏ ភ្នំពេញក្រោន បានជួបរឿងសោកស្តាយបែបនេះដូចគ្នា ព្រោះការប្រកួតនោះ ភ្នំពេញក្រោន រកបានគ្រាប់បាល់នាំមុខ ២-០ មុន ប៉ុន្តែពួកគេ បែរជារហូត៤គ្រាប់វិញ ធ្វើឱ្យចាញ់ ក្រុមសិង្ហបុរី ៤-៣ វិញ។
តាមរយៈការចាញ់២លើកជាប់ៗគ្នានេះ បានបញ្ជាក់ច្បាស់ហើយថា ក្រុមសិង្ហក្រហម ភ្នំពេញក្រោន ដែលដឹកនាំដោយគ្រូបង្គោលជនជាតិអ៊ុយក្រែន លោក Oleg Staranskyi បានធ្លាក់ចេញពីការប្រកួតនេះហើយ គឺពួកគេ នៅសល់ត្រឹមការប្រកួតបង្រ្គប់កិច្ចជាមួយក្រុម Young Elephants នៅថ្ងៃទី៣០ ខែមិថុនា ខណៈ Young Elephants បានចាញ់ក្រុមវៀតណាម ៥-១ និងចាញ់ក្រុម Houngang United ៣-១ កាលពីម្សិលមិញនោះដែរ៕
