បរទេស៖ ក្លិបសារិកាព្រៃ Newcastle ឈានដល់កិច្ចព្រមព្រៀងជាគោលដើម្បីទិញយកខ្សែការពារ Sven Botman ពីក្លិបបារាំង Lille។ Botman វ័យ២២ឆ្នាំ បានបំពេញការត្រួតពិនិត្យសុខភាព នៅក្លិប Newcastle កាលពីថ្ងៃអង្គារ និងត្រូវចូលរួមក្នុងកិច្ចសន្យារយៈពេល៥ឆ្នាំ ក្នុងការផ្ទេរដែលមានតម្លៃខ្លួន៣៥លនាអឺរ៉ូ (ស្មើនឹង៤២លានដុល្លារអាមេរិក)។
ក្លិបស្ថិតក្នុងក្របខ័ណ្ឌ Premier League មួយនេះបានបញ្ជាក់ថា ពួកគេបានប្រជែងឈ្នះក្លិបនៅអឺរ៉ុបជាច្រើន ដើម្បីនាំយកខ្សែការពារដ៏ឆ្នើមរូបនេះ ស្របពេលដែលការផ្ទេរជាផ្លូវការនឹងត្រូវបំពេញនៅសប្តាហ៍នេះ។ ការចូលរបស់ Botman បានបង្ហាញថា Newcastle នៅតែបន្តធ្វើការពង្រឹងក្រុមរបស់ខ្លួន ដើម្បីត្រៀមសម្រាប់យុទ្ធនាការថ្មីរបស់ពួកគេ ខណៈដែលអ្នកចាំទីសញ្ជាតិអង់គ្លេស Nick Pope ទើបតែបានចូលរួមជាមួយនឹងពួកគេពិក្លិប Burnley កាលពីសប្តាហ៍មុន។
ក្លិប Newcastle ក៏បានចុះហត្ថលេខាជាមួយនឹងខ្សែការពារ Matt Targett របស់ក្លិប Aston Villa ក្នុងកិច្ចសន្យាជាអចិន្ត្រៃយ៍ផងដែរ ក្រោយពីបានចំណាយពេលខ្ចីជើងដ៏ជោគជ័យ អំឡុងពេលពាក់កណ្តាលរដូវកាលមុន៕
ប្រភពព័ត៌មាន៖ Channel News Asia
