បរទេស៖ ខ្សែបម្រើអន្តរជាតិអង់គ្លេស Kalvin Phillips បានបំពេញការផ្ទេរដែល «ជាការសុបិន» ទៅកាន់ក្លិប Manchester City ដែលជាម្ចាស់ជើងឯកក្របខ័ណ្ឌ Premier League ក្នុងតម្លៃខ្លួន៤៥លានផោន (ស្មើនឹង៥៣លានដុល្លារអាមេរិក) ពីក្លិប Leeds កាលពីថ្ងៃចន្ទ។ Man City បានយល់ព្រមបង់តម្លៃខ្លួនជាគោលចំនួន៤២លានផោន ដោយបូកជាមួយនឹងប្រាក់ឧបត្ថម្ភនានាចំនួន៣លានផោនផ្សេងទៀត។
Phillips ដែលបានចុះកិច្ចសន្យារយៈពេល៦ឆ្នាំជាមួយនឹងក្រុមរបស់លោក Pep Guardiola បាននិយាយថា៖ «ខ្ញុំពិតជារីករាយណាស់ដែលបានចូលរួមជាមួយនឹងក្លិប Manchester City»។ លោក Guardiola បានជ្រើសរើសយក Phillips ដើម្បីពង្រឹងនៅតំបន់បម្រើ ក្រោយពីការចាកចេញរបស់ខ្សែបម្រើដ៏មានឥទ្ធិពល Fernandinho កាលពីចុងរដូវកាលមុន។ Man City បានធ្វើការចរចាដើម្បីទិញយក Phillips កាលពីខែមិថុនា ហើយការផ្ទេរនេះ បច្ចុប្បន្ន បានបំពេញជាផ្លូវការហើយ។ Phillips ដែលបានអភិវឌ្ឍចេញពីប្រព័ន្ធយុវជនរបស់ Leeds ផ្ទេរទៅកាន់កីឡដ្ឋាន Etihad ក្រោយពីបានបង្ហាញខ្លួន២៣៥លើក សម្រាប់ក្លិបនៅឯស្រុកកំណើតរបស់គេ ក្នុងរយៈពេល៨រដូវកាលមកនេះ។
Phillips គឺជាកីឡាករចំណូលថ្មីទី៣របស់ Man City ក្រោយពីការនាំយកខ្សែប្រយុទ្ធ Erling Haaland ពីក្លិប Borussia Dortmund និងអ្នកចាំទី Stefan Ortega ពីក្លិប Arminia Bielefeld៕
ប្រភពព័ត៌មាន៖ Channel News Asia
