បរទេស៖ ក្លិបបិសាចក្រហម Manchester United បានចុះហត្ថលេខាជាមួយនឹងខ្សែការពារហូឡង់ Tyrell Malacia ពីក្លិប Feyenoord ក្នុងកិច្ចសន្យាដែលមានសុពលភាពរហូតដល់ខែមិថុនា ឆ្នាំ២០២៦ ជាមួយនឹងជម្រើសក្នុងការបន្តកុងត្រារយៈពេល១ឆ្នាំបន្ថែមទៀត។
នេះបើយោងទៅតាមការញ្ជាក់របស់ក្លិបស្ថិតក្នុងក្របខ័ណ្ឌ Premier League មួយនេះ កាលពីថ្ងៃអង្គារ។ ព័ត៌មានលម្អិតទាក់ទងនឹងការផ្ទេរនេះ មិនត្រូវបានបង្ហាញឲ្យដឹងឡើយ ប៉ុន្តែ បណ្តាញសារព័ត៌មានចក្រភពអង់គ្លេស បានចេញផ្សាយថា ក្លិប Man United បានទិញកីឡាករវ័យ២២ឆ្នាំរូបនេះ ក្នុងតម្លៃខ្លួនប្រមាណជា១៣លានផោន (ស្មើនឹង១៥,៥៦លានដុល្លារអាមេរិក) បូករួមទាំងប្រាក់ឧបត្ថម្ភចំនួន១,៧លានផោនទៀត។ Malacia ដែលអភិវឌ្ឍចេញពីក្រុមយុវជនរបស់ Feyenoord បានបង្ហាញខ្លួន៥០លើកក្នុងរាល់យុទ្ធនាការទាំងអស់ អំឡុងរដូវកាលឆ្នាំ២០២១-២០២២ ខណៈដែលពួកគេបានបញ្ចប់ក្នុងចំណាត់ថ្នាក់លេខ៣ នៅលើតារាង Eredivisie និងបានឈានទៅលេងក្នុងក្របខ័ណ្ឌ Europa Conference League វគ្គផ្តាច់ព្រ័ត្រ មុននឹងចាញ់ក្រោមស្នាដៃក្រុម Roma។
Malacia ដែលបានបង្ហាញខ្លួនជាអន្តរជាតិ៥លើកសម្រាប់ក្រុមជម្រើសជាតិហូឡង់ នឹងត្រូវប្រជែងជាមួយនឹង Luke Shaw និង Alex Telles សម្រាប់កៅអីក្នុងជម្រើសទាំង១១នាក់ដំបូង ក្រោមការដឹកនាំរបស់គ្រូបង្វឹកថ្មីលោក Erik ten Hag។ Man United ដែលបានបញ្ចប់ក្នុងចំណាត់ថ្នាក់លេខ៦ និងបានអវត្តមានក្នុងក្របខ័ណ្ឌ Champions League នឹងចាប់ផ្តើមយុទ្ធនាការថ្មីនៃក្របខ័ណ្ឌ Premier League ដោយត្រូវប៉ះក្រុម Brighton & Hove Albion នៅថ្ងៃទី៧ ខែសីហា៕
ប្រភពព័ត៌មាន៖ Reuters