បរតេស៖ ក្លិបបិសាចក្រហម Manchester United បានឈានដល់ការព្រមព្រៀងគ្នាលើតម្លៃខ្លួន១៧លានអឺរ៉ូ (ស្មើនឹង១៨លានដុល្លារអាមេរិក) ដើម្បីចុះហត្ថលេខាជាមួយនឹងខ្សែការពារស្លាបឆ្វេង Tyrell Malacia របស់ក្លិប Feyenoord ក្រោយពីបានប្រជែងយកឈ្នះក្លិប Lyon ដើម្បីទិញយកកីឡាករអន្តរជាតិហូឡង់វ័យ២២ឆ្នាំរូបនេះ។
Lyon បានឈានដល់ការព្រមព្រៀងគ្នាដោយផ្ទាល់មាត់ជាមួយនឹង Malacia សម្រាប់តម្លៃខ្លួន១២លានអឺរ៉ូ បូកទាំងប្រាក់ឧបត្ថម្ភចំនួន៣លានអឺរ៉ូទៀត និងបានរង់ចាំកីឡាកររូបនេះធ្វើដំណើរទៅពិនិត្យសុខភាព និងចុះកិច្ចសន្យា ប៉ុន្តែ កាលពីថ្ងៃចន្ទ ក្លិប Man United បានចូលទៅប្រជែងទិញដែរ ហើយសំណើរបស់ពួកគេត្រូវបានក្លិប Feyenoord ទទួលយកតែម្តង។
ស្របពេលជាមួយគ្នានេះ Man United ក៏ឈានដល់ការព្រមព្រៀងក្នុងតម្លៃខ្លួន៦៥លានអឺរ៉ូ (ស្មើនឹង៦៨លានដុល្លារអាមេរិក) បូករួមទាំងប្រាក់ឧបត្ថម្ភនានាផ្សេងទៀត ជាមួយនឹងក្លិប Barcelona ដើម្បីទិញយកខ្សែបម្រើអន្តរជាតិហូឡង់ Frenkie de Jong។ ប៉ុន្តែ ទោះបីជាយ៉ាងណា ក្លិប Man United បញ្ជាក់ថា ការផ្ទេរនេះ មិនទាន់សម្រេចជាផ្លូវការឡើយ និងនៅសល់ការងារសំខាន់ៗជាច្រើនទៀតដែលត្រូវដោះស្រាយ។ ប៉ុន្តែ ដំណើការនៃការផ្ទេរនេះ ត្រូវបានគេចាត់ទុកថា មានភាពវិជ្ជមាន និងត្រូវបានរំពឹងទុកថា នឹងបំពេញជាផ្លូវការក្នុងពេលឆាប់ៗ៕
ប្រភពព័ត៌មាន៖ The Guardian
