បរទេស៖ ក្លិប West Ham United បានយល់ព្រមលើការផ្ទេរមួយ ដើម្បីទិញយកខ្សែបម្រើអន្តរជាតិបែលហ្ស៊ិក Amadou Onana ពីក្លិប Lille របស់ក្របខ័ណ្ឌបារាំង Ligue 1 សម្រាប់តម្លៃខ្លួន៤០លានផោន (ស្មើនឹង៤០,៥លានដុល្លារអាមេរិក) ក្នុងនោះរាប់បញ្ចូលទាំងប្រាក់ឧបត្ថម្ភនានាផងដែរ។ នេះបើយោងទៅតាមការចេញផ្សាយរបស់បណ្តាញសារព័ត៌មានចក្រភពអង់គ្លេស កាលពីថ្ងៃពុធ។
សារព័ត៌មាន BBC និង The Guardian បានចេញផ្សាយថា ក្លិបរបស់ក្របខ័ណ្ឌ Premier League មួយនេះ មិនទាន់ពិភាក្សាលើលក្ខខណ្ឌផ្ទាល់ខ្លួនជាមួយនឹង Onana វ័យ២០ឆ្នាំ ដែលបានបង្ហាញខ្លួនជាលើកដំបូងរបស់គេសម្រាប់ក្រុមជម្រើសជាតិបែលហ្ស៊ិក ក្នុងពេលក្រុមខ្លួនបានរងបរាជ័យក្នុងលទ្ធផល ៤-១ ក្រោមស្នាដៃក្រុមជម្រើសជាតិហូឡង់ ក្នុងការប្រកួត Nations League។
ក្លិប West Ham កំពុងតែសម្លឹងរកការពង្រឹងនៅតំបន់បម្រើរបស់ពួកគេ ដើម្បីធ្វើជាជំនួយដល់កីឡាករ Declan Rice និង Tomas Soucek ក្រោយពីការចូលនិវត្តន៍របស់ប្រធានក្លិបគឺកីឡាករ Mark Noble កាលពីរដូវកាលមុន។ ក្លិបនេះ បានបំពេញការ នាំយកកីឡាករមួយចំនួនរួចជាស្រេចដូចជា អ្នកចាំទី Alphonse Areola ខ្សែបម្រើ Flynn Downes ខ្សែប្រយុទ្ធ Gianluca Scamacca និងខ្សែការពារ Nayef Aguerd ក្នុងពេលបើករទីផ្សារដោះដូរកីឡាករនៅរដូវក្តៅនេះ៕
ប្រភពព័ត៌មាន៖ Channel News Asia
