ក្រុមកោះកុងអេហ្វស៊ី បានកត់ត្រានូវជ័យជម្នះដ៏មានន័យ គឺការជម្នះការលំបាក និងហានិភ័យនៃជំងឺកូវីដ១៩ រហូតអាចឈ្នះពានថ្នាក់ខេត្ត ការប្រកួតពានរង្វាន់សម្តេច ហ៊ុន សែន ប្រចាំឆ្នាំ២០២១ ជាលើកដំបូង បន្ទាប់ពីពួកគេ បានយកឈ្នះលើក្រុមខេត្តត្បូងឃ្មុំ ៣-០ ក្នុងការប្រកួតផ្តាច់ព្រ័ត្រ កាលពីថ្ងៃសៅរ៍។
តាមរយៈការប្រកួត នៅកីឡដ្ឋានខេមបូឌាអ៊ែរវ៉េ នោះ ក្រុមទើបរៀបចំរចនាដឹកនាំថ្មី កោះកុងអេហ្វស៊ី ធ្វើបានយ៉ាងល្អ ដើម្បីយកឈ្នះក្រុមជើងឯករងឆ្នាំចាស់ ខេត្តត្បូងឃ្មុំ ដោយក្នុងនោះកីឡាករ ប៉ែន បញ្ញាវឌ្ឍ ជាអ្នករកបានគ្រាប់បាល់បើកឆាក នៅនាទីទី៣៨ មុនពេល វិសាល ជៀន បានបន្ថែមគ្រាប់បាល់ទី២ នៅនាទីទី៨១ ហើយអតីតកីឡាកររបស់ក្រុមអង្គរថាយហ្គឺរ ពៅ ភារិទ្ធ ជាអ្នករកបានគ្រាប់បាល់ទី៣ ចុងក្រោយ តាមរយៈការស៊ុតបាល់ពិន័យ១១ម៉ែត្រ បានសម្រេច នៅនាទីទី ៩០+៣។
គ្រប់គ្នា នៅក្នុងក្រុមកោះកុងអេហ្វស៊ី បានបង្ហាញការរំភើបខ្លាំង សម្រាប់ការឈ្នះបានជើងឯកនេះ ព្រោះវាជាប្រវត្តិសាស្រ្តរបស់ខេត្តកោះកុង ដែលបានលើកពានមួយនេះ ប៉ុន្តែជ័យជម្នះរបស់ពួកគេ បានធ្វើឱ្យក្រុមខេត្តត្បូងឃ្មុំ មានការខកចិត្តខ្លាំង ហើយកីឡាកររបស់ក្រុមមនេះ មួយចំនួន ក៏បានសម្រក់ទឹកភ្នែក បង្ហាញការខូចចិត្ត ជាមួយការចាញ់នេះផងដែរ ខណៈក្រុមខេត្តបន្ទាយមានជ័យ បានទទួលលេខ៣ ដោយស្វ័យប្រវត្តិ។
តាមរយៈការឈ្នះពានថ្នាក់ខេត្តនេះ ក្រុមកោះកុងអេហ្វស៊ី ទទួលបានប្រាក់រង្វាន់ចំនួន១៥លានរៀល ហើយជាមួយគ្នានេះ គ្រូបង្គោលលោក ហុក សុជីវ័ន និងអ្នកចាំទី ខេនដេត សុធាវឌ្ឍនា របស់ក្រុមនេះ ក៏ទទួលពានពាន ក្នុងនាមជាគ្រូបង្វឹកល្អ និងអ្នកចាំទីល្អ ប្រចាំព្រឹត្តិការណ៍នេះ ផងដែរ ដោយអ្នកទាំង២ ទទួលបានប្រាក់រង្វាន់បន្ថែម ក្នុងម្នាក់ៗចំនួន១,៥លានរៀល។
ចំណែកក្រុមលេខ២ ខេត្តត្បូងឃ្មុំ ទទួលបានប្រាក់រង្វាន់ ៧,៥លានរៀល ហើយក្រុមលេខ៣ ខេត្តបន្ទាយមានជ័យ បានទទួលប្រាក់រង្វាន់ចំនួន៥លានរៀល។ ជាមួយគ្នានេះ ក្រុមកោះកុងអេហ្វស៊ី ខេត្តត្បូងឃ្មុំ និងក្រុមខេត្តបន្ទាយមានជ័យ នឹងត្រូវឡើងទៅប្រកួតពានរង្វាន់សម្តេចហ៊ុនសែន ថ្នាក់ជាតិ ជាមួយបណ្តាក្រុមទាំង១៣ ដែលកំពុងលេខ នៅលីគកំពូលកម្ពុជា ជាបន្តទៀត។
សម្រាប់ដឹកនាំក្រុមកោះកុងអេហ្វស៊ី ឱ្យឈ្នះពាន ជាលើកដំបូងនេះ គ្រូបង្គោល លោក ហុក សុជីវ័ន បានសរសរបង្ហោះ នៅលើហ្វេសប៊ុករបស់លោកថា៖ «ជាដំបូង ខ្ញុំបាទសូមថ្លែងឣំណរគុណ ដល់ សម្តេច ពិជ័យសេនា លោកជំទាវឣភិបាលខេត្ត និងថ្នាក់ដឹកនាំខេត្តទាំងឣស់ ជាពិសេសបងប្រធានក្លិប បងឣនុប្រធានក្លិប ដែលតែងតែជំរុញ នឹងលើកទឹកចិត្តគ្រប់ពេលវេលា ដល់ក្រុមកីឡាបាល់ទាត់កោះកុងឣេហ្វស៊ី តាំងពីដើមរហូតរៀងមក។ ឣរគុណក្រុមការងារ កីឡាករ ដែលតែងតែតស៊ូជម្នះគ្រប់ឧបសគ្គ ទោះត្រូវឆ្លងកាត់នូវជំងឺដ៏កាចសាហាវ កូវីដ១៩ ក៏ដោយ ក៏មិនរុញរា ខាំមាត់សង្កត់ចិត្ត ដើរឆ្លងកាត់វា រហូតមកដល់ថ្ងៃនេះ យើងអាចធ្វើវាបានហើយ កោះកុង »។
អតីតគ្រូបង្គោលក្រុមវិសាខា លោក ហុក សុជីវ័ន បានបន្ថែមថា៖ «ឣរគុណនូវកម្លាំងចិត្តរបស់ឣ្នកគាំទ្រ ដែលតែងតែនៅពីក្រោយពួកយើងរហូតមក យើងនឹងដើររួមគ្នាបន្តទៀត សម្រាប់ កោះកុង ។ យើងនៅមានភារៈកិច្ចបន្តទៀត ទាំងឆ្នាំនេះ និងឆ្នាំក្រោយច្រើនទៀត សូមប្អូនៗ ថែរក្សាសុខភាពឱ្យបានល្អ ៣កុំ ៣ការពារ តាមការណែនាំរបស់រាជរដ្ឋាភិបាល និងក្រសួងសុខភិបាលឱ្យបានខ្ជាប់ខ្ជួន។ គោរពជូនពរថ្នាក់ដឹកនាំទាំងឣស់ ក្រុមការងារ កីឡាករ និងឣ្នកគាំទ្រទាំងឣស់ សូមឱ្យមានសុខភាពល្អ ជោគជ័យគ្រប់ភារៈកិច្ច»៕
