ខ្សែប្រយុទ្ធពាក់លេខ២៩ ពឿន គន្ធា នៅតែអាចផ្តល់ស្នាមញញឹមយ៉ាងស្រស់ ដល់ក្រុមនារីភ្នំពេញក្រោន បន្ទាប់ពីកីឡាការិនីរូបនេះ រកបាន២គ្រាប់តែម្នាក់ឯង ដើម្បីជួយឱ្យក្រុមរបស់ខ្លួន បានយកឈ្នះលើក្រុមម្ចាស់ផ្ទះ សៀមរាប ក្នុងការប្រកួតបាល់ទាត់ជម្រើសជើងឯកបាល់ទាត់នារី ឆ្នាំ២០២១ កាលពីថ្ងៃអាទិត្យ ចំណែកក្រុមម្ចាស់ជើងឯក ណាហ្គាវើលដ៍កំពង់ស្ពឺ និងព្រះខ័នរាជស្វាយរៀង សុទ្ធតែដណ្តើមបាន៣ពិន្ទុដូចគ្នា។
តាមរយៈការប្រកួត កាលពីម្សិលមិញនេះ ក្រុមនារីភ្នំពេញក្រោន និងសៀមរាប ដែលសុទ្ធតែមិនធ្លាប់ស្គាល់ការចាញ់ដូចគ្នានោះ បានប្រកួតគ្នាយ៉ាងស្វិតស្វាញបំផុត ព្រោះក្រុមទាំង២នេះ សុទ្ធតែត្រូវការឈ្នះ ដើម្បីឡើងទៅឈរនៅលេខ១ ប៉ុន្តែការរកបាន២គ្រាប់ជាប់ៗគ្នារបស់ខ្សែប្រយុទ្ធ ពឿន គន្ធា នៅនាទីទី១៦ និងទី៨៦ បានជួយឱ្យ ភ្នំពេញក្រោន បានយកឈ្នះលើក្រុមម្ចាស់ផ្ទះ សៀមរាប ២-១។
ការរកបានគ្រាប់បាល់ទី៦ និងទី៧ ប្រចាំព្រឹត្តិការណ៍នេះរបស់ ពឿន គន្ធា វាមិនត្រឹមតែបានជួយឱ្យ ក្រុមនារីភ្នំពេញក្រោន បន្តឈរនៅលេខ១ ជាមួយការឈ្នះទាំង៥ប្រកួតប៉ុណ្ណោះទេ ប៉ុន្តែការឈ្នះបាន៣ពិន្ទុបន្ថែមនេះ វាបានជួយឱ្យក្រុមភ្នំពេញក្រោន សម្រេចគោលរបស់ខ្លួនផងដែរ ដើម្បីបង្កើនភាគរយកាន់តែខ្ពស់ ក្នុងការឈានទៅរកការឈ្នះបានតំណែងជើងឯក នារដូវកាលនេះ។
ជាមួយក្រុមនេះក្រុមម្ចាស់ជើងឯក ណាហ្គាវើលដ៍កំពង់ស្ពឺ ដែលទើបបានចាញ់ក្រុមភ្នំពេញក្រោន ២-០ កាលពីសប្តាហ៍មុននោះ បានយកឈ្នះលើក្រុមមន្ទីរអយកខេត្តបាត់ដំបង ៦-០ កាលពីថ្ងៃអាទិត្យនោះដែរ ដើម្បីឡើងទៅឈរនៅលេខ២វិញ ដោយមាន១២ពិន្ទុស្មើជាមួយក្រុមទើបធ្លាក់មកលេខ៣ សៀមរាប។
ចំណែកក្រុមជើងឯកស្ទួន ព្រះខ័នរាជស្វាយរៀង បានរកឃើញជ័យជម្នះជាលើកទី២ បន្ទាប់ទៅលើការឈ្នះ១ និងចាញ់៣លើកកន្លងមកនេះ បន្ទាប់ពីពួកគេ បានយកឈ្នះក្រុមម្ចាស់ផ្ទះ បឹងកេត ៦-០ រីឯក្រុមមន្ទីរអយកខេត្តកំពង់ឆ្នាំង ដែលញ៉ាំញីដោយការបរាជ័យនោះ បានរកឃើញការឈ្នះជាលើកដំបូងរបស់ខ្លួនហើយ ក្រោយពេលពួកគេ បានយកឈ្នះក្រុមមន្ទីរអយកខេត្តកណ្តាល ៧-៣ កាលពីថ្ងៃអាទិត្យ នោះដែរ៕
