ម្ចាស់មេដាយសរឹទ្ធស៊ីហ្គេម២សម័យកាល វ៉ាន់ វឿន បានកំពុងតែបញ្ឆះឱ្យមានឆាកប្រយុទ្ធកាន់តែក្តៅខ្លាំង នៅពេលរូបគេត្រូវវិលមកជួបកីឡាករវ័យក្មេងកំពុងឡើងជើងខ្លាំង សូត្រ វាសនា នៅក្នុងការប្រកួតវគ្គពាក់កណ្តាលផ្តាច់ព្រ័ត្រ ដណ្តើមពានមាស លើសង្វៀនថោន នាព្រឹកថ្ងៃអាទិត្យនេះ។
អ្នកលេងកាំភ្លើងភ្លោះ វ៉ាន់ វឿន បានទទួលស្គាល់ថា សូត្រ វាសនា នៅពេលនេះ មិនដូចជា សូត្រ វាសនា ដែលរូបគេបានឈ្នះ កាលពី២ ទៅ៣ឆ្នាំមុន ដោយគេកំពុងមានសមត្ថភាពខ្លាំង ប៉ុន្តែកីឡាករជាក្មេងកំព្រា វ៉ាន់ វឿន មានការជឿជាក់ខ្លាំង ទៅលើសមត្ថភាពខ្លួនឯង។
«សម្រាប់ការជួបគ្នា កាលពី២ ទៅ៣ឆ្នាំមុន ខ្ញុំធ្លាប់ឈ្នះគាត់២ដងហើយ ប៉ុន្តែឥឡូវសមត្ថភាពគាត់កើនឡើង អាចនឹងពិបាកសម្រាប់ខ្ញុំខ្លះ តែខ្ញុំជឿជាក់លើសមត្ថភាពខ្លួនឯង ហើយខ្ញុំប្តេជ្ញាថា នឹងខំប្រឹងឱ្យអស់ពីសមត្ថភាព ដើម្បីឈានទៅវគ្គផ្តាច់ព្រ័ត្រឱ្យបាន»។ វ៉ាន់ វឿន បានបង្ហាញការតាំងចិត្តសម្រាប់ការជួប សូត្រ វាសនា នៅវគ្គពាក់កណ្តាលផ្តាច់ព្រ័ត្រនេះ។
តាមរយៈការប្រកួតជម្រុះតាមពូលA កន្លងមកនេះ សូត្រ វាសនា ពិតជាធ្វើយ៉ាងល្អ ដោយរូបគេ បានផ្តួល ជ័រ ពៅ ឱ្យសន្លប់ត្រឹមទឹកទី១ រួចបន្តផ្តួល ម៉ន សាម៉េត នៅទឹកទី៣ និងបានយកឈ្នះ វេង សុភ័ក្រ ដោយពិន្ទុ ដើម្បីទទួលបានចំណាត់ថ្នាក់លេខ១ ហើយនៅក្រោយការរកឃើញជ័យជម្នះទាំង៣ប្រកួតនោះ សូត្រ វាសនា បានអះអាងថា ការរកឃើញជ័យជម្នះដ៏សំខាន់នេះ វាកើតចេញពីការខិតខំប្រឹងរបស់រូបគេផ្ទាល់ ដើម្បីគេចចេញពីការរិះគន់ ដែលថា រូបគេជាកីឡាករខ្សោយ។
«តាំងពេលខ្ញុំ មានឈ្មោះបានចូលរួមប្រកួតពាននេះ ខ្ញុំបានព្យាយាមហ្វឹកហាត់ខ្លាំងណាស់ គឺខំហាត់ គ្មានបានទៅណាទេ ព្រោះខ្ញុំមានបំណងប្រាថ្នា ចង់បានពានមាសនេះ តែយើងនៅមិនទាន់អាចប៉ាន់ស្មានបានទេ មានតែខំប្រឹងបន្តទៅមុខទៀត»។ នេះជាការបញ្ជាក់របស់ សូត្រ វាសនា ប៉ុន្តែកីឡាកររូបនេះ នៅតែជំរុញខ្លួនឯង ត្រូវខំប្រឹងឱ្យបានខ្លាំងថែមទៀតជាមួយការពោលពាក្យបែបដាក់ខ្លួនថា៖ «នៅក្នុងចំណោមបេក្ខភាពទាំងនេះ ខ្ញុំមានកម្រិតសមត្ថភាព នៅទាបជាងគេ អ៊ីចឹងយើងមានតែខំប្រឹងឱ្យបានខ្លាំងថែមទៀត»។
យ៉ាងណាក៏ដោយ ជុំវិញការបង្ហាញមហិច្ឆតា ចង់ឈ្នះពានមាសរបស់ សូត្រ វាសនា នេះ វ៉ាន់ វឿន បានបញ្ជាក់ថា៖ «គាត់ល្អផ្លែ ហើយគាត់វ៉ៃឆ្លាត ដោយភាគច្រើនធាក់ដក ថយទាត់ ហើយគាត់ខ្ពស់ទៀត អ៊ីចឹងកីឡាករដែលទាបជាងគាត់ គឺពិបាក ក្នុងការយកជ័យជម្នះលើគាត់។ តែទោះបីជាយ៉ាងណា បើសិនជា សូត្រ វាសនា គាត់ចង់បានពានមាស ឱ្យគាត់រំលងខ្ញុំឱ្យបានសិនទៅ»៕
