ទិវាកីឡាដើម្បីទាំងអស់គ្នាដែលប្រព្រឹត្តទៅកាលពីម្សិលមិញនេះ បញ្ចប់ដោយជោគជ័យព្រមទាំងប្រកបដោយស្នាមញញឹមរបស់កីឡាករ កីឡាការិនីដែលបានចូលរួមប្រកួតដណ្ដើមយកចំណាត់ថ្នាក់។
លោក ស៊ាន បូរ៉ាត់ រដ្ឋលេខាធិការក្រសួងអប់រំយុវជន និងកីឡា បានឲ្យដឹងថា ក្នុងនាមលោកតំណាងឲ្យក្រសួងអប់រំ មានចិត្តរំភើបសប្បាយរីករាយជាខ្លាំង នៅពេលដែលឃើញព្រឹត្តិការណ៍កីឡាដើម្បីទាំងអស់គ្នានេះប្រកបដោយមិត្តភាព សេរីភាព យោគយល់គ្នា និងចេះអធ្យាស្រ័យគ្នាដូចការគ្រោងទុក។
រដ្ឋលេខាធិការក្រសួងអប់រំរូបនេះបន្តថា ការប្រកួតនេះប្រព្រឹត្តិទៅបានយ៉ាងល្អប្រសើរ ដោយមានការខំប្រឹងប្រែងអស់ពីកម្លាំងកាយចិត្ត និងបច្ចេកទេសរបស់ក្រុមនិមួយៗ រួមផ្សំភាពយុត្តិធម៌ពីការកាត់សេចក្ដីមិនលំអៀងពីសំណាក់អាជ្ញាកណ្ដាល ចៅក្រមផងដែរ។ កីឡាដើម្បីទាំងអស់គ្នានេះ ក៏ជាឱកាសសម្រាប់កីឡាករ កីឡាការិនីទាំងអស់បានបញ្ចេញសមត្ថភាព រកឃើញពីចំណុចខ្លាំង និងចំណុចខ្សោយនានាដើម្បីដុសខាត់ ឬកែប្រែឲ្យរឹតតែប្រសើរឡើងវិញនាពេលក្រោយទៀត។
ទិវាកីឡាដើម្បីទាំងអស់គ្នានេះបញ្ចប់ទៅកាលពីល្ងាចថ្ងៃទី២៣ ខែវិច្ឆិកា ២០១៧ នៅឯពហុកីឡដ្ឋានជាតិ។ ដោយក្រុមលេខ១ ផ្នែកបុរស បានទៅ វិទ្យាស្ថានជាតិអប់រំកាយ និងកីឡាក្រុមទី៧ ចំណែកក្រុមលេខ១ ផ្នែកនារី បានទៅវិទ្យាស្ថានជាតិអប់រំកាយ និងកីឡាក្រុមទី១ ហើយក្រុមចម្រុះ លេខ១បានទៅ សហព័ន្ធខ្មែរអត្តពលកម្មស្ម័គ្រចិត្ត៕
Via: Sabay
ទិវាកីឡាដើម្បីទាំងអស់គ្នាបញ្ចប់ដោយជោគជ័យ និងពោរពេញដោយស្នាមញញឹម
អត្ថបទទាក់ទង
