អ្នកប្រដាល់ជើងចាស់ អ៊ុំ វណ្ណេត និងកីឡាករ គឹម វាសនា បានឡើងវគ្គ៤នាក់ចុងក្រោយនៅ TV 5 Boxing Knock Out Series (K-Cement) របស់សង្វៀនប៉ុស្តិ៍លេខ ៥ ហើយ ក្រោយពីវាយដៃគូឱ្យបោះបង់ការប្រកួតដូចគ្នា។
វណ្ណេត ប៉ះជាមួយ វ៉ែន ហុងជីវុង ពិតជាពិបាកខ្លាំងសម្រាប់កីឡាករម្នាក់នេះ ត្បិតអីរូបគេមានវ័យជ្រេទៅហើយ។ យ៉ាងណាមិញ យោងទៅតាមបទពិសោធនៃការប្រកួតច្រើនធ្វើឱ្យវណ្ណេតអាចរក្សាកម្លាំងបាន និងវាយបកទៅ ហុងជីវុង វិញ រហូតទទួលបានផល។ នៅត្រឹមទឹក៣ ហុងជីវុង បានបោះបង់ការប្រកួត ដោយសារតែអាចទ្រាំទ្រទៀតបាន។ សម្រាប់១គូទៀត សំងាង ឌុន និងគឹម វាសនា ក៏មិនខុសពីគូខាងលើប៉ុន្មានដែរ។ គឹម វាសនា អាចយកឈ្នះលើសំអាង ឌុន បានដោយវាយឱ្យកីឡាកររូបនេះបោះបង់ការប្រកួត។
ការប្រកួត TV5 Boxing Knock Out Series នៅសង្វៀនប្រដាល់ប៉ុស្តិ៍លេខ៥ មានកីឡាករចូលរួមចំនួន៣២នាក់ ប្រកួតជម្រុះរហូតដល់រកឃើញម្ចាស់ពានរង្វាន់តែម្ដង ហើយការប្រកួតនេះកីឡាកររូបណាចាញ់ត្រូវធ្លាក់តែម្ដង ដោយមិនមានប្រកួតសន្សំពិន្ទុនោះទេ។ ដោយការប្រកួតទៀតសោតធ្វើឡើងត្រឹម៣ទឹកទេ។
សម្រាប់អ្នកទទួលបានលេខ១វិញ នឹងទទួលបានប្រាក់៤ពាន់ដុល្លារ អមជាមួយពាន១ លេខ២ទទួលបាន២ពាន់ដុល្លារ លេខ៣ទទួលបាន៧៣០ដុល្លារ និងលេខ៤ទទួលបាន៥០០ដុល្លារ៕
Via: Sabay
