ម្ចាស់ពានរង្វាន់ Champion Snooker League លោក មួន ម៉ារ៉ា បង្ហើបថាឥលូវនេះសម្លឹងឃើញកីឡាករដែលមានថ្វីដៃល្អជាបណ្ដើរៗហើយ តាមរយៈការប្រកួត ៤-៥ សប្ដាហ៍នេះ។
លោក មួន ម៉ារ៉ា ម្ចាស់ក្លឹប Champion Snooker បានឲ្យដឹងថា មកដល់សប្ដាហ៍ទី៥នេះការប្រកួតដំណើរការល្អជាធម្មតា បើទោះជាមានការផ្លាស់ប្ដូរបេក្ខភាពមួយចំនួនក្ដី តែកីឡាករទាំងអស់រឹតតែបង្កើនសមត្ថភាពថែទៀត ដើម្បីស្វែងរកពិន្ទុបន្ថែមក្នុងការដណ្ដើមយកពានរង្វាន់នៅពេលបញ្ចប់ការប្រកួត។
ម្ចាស់ក្លឹបខាងលើបន្តថា សមត្ថភាពកីឡាករមួយចំនួនគឺប្រហាក់ប្រហែលគ្នាតែម្ដង ពោលគឺពិន្ទុប្រដំប្រសងគ្នាខណៈពិន្ទុក្នុងហ្វេម និងចំនួនហ្វេមក៏ដូចគ្នាដែរ ដូច្នេះអាចថាវាហាក់ដូចជាតានតឹងបន្តិចសម្រាប់កីឡាករនិមួយៗពេលប៉ះគ្នា។ បើតាមការសង្កេតរបស់លោក មើលឃើញថា ការប្រកួតពានរង្វាន់ស្នូរឃ័រមួយនេះពិតជាចម្រាញ់រកបានកីឡាករថ្មី និងល្អជាបណ្ដើរៗហើយជាក់ស្ដែងដូចជាបេក្ខភាព សួន ឆាយ ផែន ណារ៉ុង សុខ ភារ៉ា និង ច្រឹង ភារម្យ ជាដើម សុទ្ធតែអ្នកដែលមានថ្វីដៃល្អនិងលេចធ្លោនាពេលបច្ចុប្បន្ន។
អតីតតារាចម្រៀងរូបនេះបន្ថែមជាចុងក្រោយថា សម្រាប់ប្រិយមិត្តដែលនិយមកីឡាស្នូរឃ័រនៅកម្ពុជាទាំងអស់ បើសិនចង់ទស្សនាការប្រកួតផ្ទាល់ក៏អាចអញ្ជើញមកក្លឹប Champion Snooker ទាំងពីរទីតាំងទី១ ក្បែរផ្សារដេប៉ូ និងទី២ នៅផ្ទះលេខ ២២ សង្កាត់បឹងកក់២ ខណ្ឌទួលគោក រៀងរាល់ថ្ងៃសៅរ៍ និងអាទិត្យ ឬអាចតាមដានការផ្សាយផ្ទាល់របស់ហ្វេសបុកផេក Champion Snooker ក៏បានដែរ ក្រៅពីនេះក្លឹបរបស់លោកក៏មានតាបស្នូរឃ័រទំនេរសម្រាប់ឲ្យអ្នកដែលចង់លេងកម្សាន្តនៅទីនោះទៀតផង។
សម្រាប់ការប្រកួតពានរង្វាន់ Champion Snooker League លើកទី១ ធ្វើឡើងរៀងរាល់ចុងសប្ដាហ៍ថ្ងៃសៅរ៍ អាទិត្យ ដែលមានកីឡាករចូលរួមប្រកួត២៤នាក់ ហើយគិតមកដល់ពេលនេះដំណើរការប្រកួតដល់សប្ដាហ៍ទី៥មកហើយ៕
Via: Sabay Sport
ពានរង្វាន់ Champion Snooker League សម្លឹងឃើញកីឡាករមានសមត្ថភាពបណ្ដើរៗហើយ
អត្ថបទទាក់ទង
