លោក មាស ចាន់ណា គ្រូបង្គោលក្លឹបណាហ្គាវើលបានអះអាងថា ប្រសិនបើកូនក្រុមរបស់លោកបន្តមានឆន្ទៈខ្ពស់ក្នុងការប្រកួត នោះនឹងលើកពាន Hun Sen Cup 2017។
ជំនួបវគ្គផ្ដាច់ព្រ័ត្រ Hun Sen Cup នាថ្ងៃទី២៧ ខែធ្នូ ឆ្នាំ២០១៧ ណាហ្គាវើល នឹងប៉ះក្រុម ព្រះខ័នរាជស្វាយរៀង ដែលជាជំនួបកាត់ក្ដីលើកពានប្រចាំរដូវកាល២០១៧។ ក្រោយណាហ្គាវើល យកឈ្នះ បឹងកេត ៣-២ កាលពីយប់មិញនៅពហុកីឡដ្ឋានជាតិ លោក មាស ចាន់ណា បានឲ្យដឹងថា កូនក្រុមរបស់លោកកំពុងមានឆន្ទៈខ្ពស់ក្នុងការប្រកួត ពិសេសនាជំនួបកាលពីយប់មិញនេះតែម្ដង។
លោកបន្ថែមថា ចំណុចភ័យខ្លាចបំផុតរបស់លោកក្នុងនាមជាគ្រូបង្វឹក គឺកូនក្រុមរបស់ខ្លួនមិនបន្តមានឆន្ទៈចង់ឈ្នះការប្រកួតដូចពេលនេះ។ ក្រៅពីបញ្ហាមួយនេះលោកព្រួយបារម្ភមួយចំណុចទៀតគឺកាលវិភាគការប្រកួតញឹកញាប់ពេក ពោលគឺលោកត្រូវមានភារកិច្ចប្រកួត Play Off លីគកំពូលផងដែរ។
ការប្រកួត Play Off លីគកំពូលរវាង ណាហ្គាវើល និងក្រសួងការពារជាតិ នឹងធ្វើឡើងនៅថ្ងៃទី២០ ខែធ្នូ ឆ្នាំ២០១៧ នៅពហុកីឡដ្ឋានជាតិ៕
