លោក ផាន សុផានណារ៉ា គ្រូជំនួយរបស់អគ្គីសនីកម្ពុជាបានទម្លាយថា សម្រាប់ពាន Hun Sen Cup ឆ្នាំនេះគោលដៅក្លឹបរបស់លោកកំណត់ត្រឹមធ្វើយ៉ាងណាអាចចូលរួមវគ្គ ៨ក្រុមក្រោយប៉ុណ្ណោះ ហើយការយកឈ្នះបឹងកេតទទួលបានលេខ ៣ នេះជាជោគជ័យហួសក្ដីរំពឹងទុក។
អគ្គីសនីយកឈ្នះបឹងកេត ដោយការទាត់បាល់ប៉េណាល់ទីកាត់សេចក្កី ៥-៤ បន្ទាប់ពីស្មើគ្នា ១-១ នៅ៩០នាទីពេញ ដើម្បីទទួលបានលេខ ៣ ក្នុងពានរង្វាន់សម្ដេចប្រចាំឆ្នាំ២០១៧ ដែលជាឆ្នាំចូលរួមលើកដំបូងរបស់ពួកគេ។ ក្រោយយកឈ្នះបឹងកេតកាលពីយប់មិញនេះភ្លាមគ្រូជំនួយខាងលើបាននិយាយថា ៖« ដំបូងឡើយក្លឹបរបស់យើងចង់សម្រេចគោលដៅ អាចឈានចូលវគ្គ ៨ ក្រុមចុងក្រោយ។ ប៉ុន្តែលទ្ធផលជាក់ស្ដែងគឺយើងមានភាពជោគជ័យខ្លាំង ដោយទទួលបានចំណាត់ថ្នាក់លេខ ៣ លើសពីអ្វីដែលយើងចង់បាន» ។
ដោយឡែកសម្រាប់ឆ្នាំក្រោយក្លឹបអគ្គិសនីកំណត់គោលដៅថា នឹងធ្វើយ៉ាងណាអាចឈានជើងចូលវគ្គ ៤ ក្រុមចុងក្រោយបន្តទៀត។ ស្របពេលទិសដៅដំបូងគឺរៀបចំសម្លឹងរកកីឡាករល្អៗបន្ថែម និងបង្កើនការហ្វឹកហាត់សម្រាប់ដើមឆ្នាំ២០១៨។
សូមបញ្ជាក់ថា ក្លឹបអគ្គិសនីកម្ពុជា បានបង្កើតឡើងនៅឆ្នាំ២០១៦ ដោយបានឡើងមកលេងលីគកំពូលនៅឆ្នាំ២០១៧ ហើយក៏ជាឆ្នាំជោគជ័យរបស់ពួកគេក្នុងពានរង្វាន់សម្ដេចនេះដែរ៕
Via: Sabay
