ក្រោយពីធ្វើការប្រកួតជាបន្តបន្ទាប់តាំងពីថ្ងៃទី៣០ ឧសភា ២០១៨ កន្លងទៅ ឥលូវឈានដល់វគ្គផ្ដាច់ព្រ័ត្រនាព្រឹកនេះហើយលើ ៨ប្រភេទទម្ងន់ ផ្នែកកីឡាប្រដាល់គុនខ្មែរនាព្រឹត្តិការណ៍កីឡាជាតិលើកទី២។ ក្នុងចំណោមគូផ្ដាច់ព្រ័ត្រទាំងនោះក៏មានកីឡាករ សុខ ធី ត្រូវប៉ះ ឈុត សេរីវណ្ណថង ផងដែរ ហើយគូនេះ កំពុងធ្វើឲ្យមហាជនចាប់អារម្មណ៍ចង់ដឹងលទ្ធផលរវាងជើងខ្លាំងមកពីខេត្តបន្ទាយមានជ័យ និងបាត់ដំបងនេះខ្លាំងណាស់។
កីឡាករ សុខ ធី
កីឡាករ ឈុត សេរីវណ្ណថង
សុខ ធី ក៏បានឲ្យដឹងថា ឈុត សេរីវណ្ណថង ជាអ្នកប្រដាល់ដែលល្អម្នាក់ផងដែរ ហើយស្នៀតដែលល្អនិងមានប្រសិទ្ធភាពនោះគឺ ទាត់ និងធាក់។ ទោះជាយ៉ាងណាកូនសិស្សលោកគ្រូ សាន់ សៃយ៉ាន់ រូបនេះនឹងខំប្រឹងប្រកួតឲ្យអស់ពីសមត្ថភាពដើម្បីដណ្ដើមមេដាយមាស។
ចំពោះ វណ្ណថង វិញធ្លាប់ប្រាប់ពីមុនមកថា បានជួបប្រកួតជាមួយសិស្សច្បង សុខ ធី ឬ កាកា គឺរឿងសប្បាយចិត្តមួយរបស់គេ ព្រោះបានជួបអ្នកខ្លាំង ដែលមានប្រវត្តិប្រកួតដល់ទៅរយដងបែបនេះ។ បន្ថែមពីនេះទៀត អ្នកប្រដាល់មកពីបាត់ដំបងខាងលើ ថាបើនិយាយពីរឿងខ្លាចមិនខ្លាចទេ ព្រោះបើតាំងខ្លួនជាអ្នកកីឡាហើយត្រូវតែក្លាហាន។
កម្មវិធីប្រកួត
រំលឹកដែរថា ប្រកួតផ្ដាច់ព្រ័ត្រនេះចាប់ផ្ដើមពីម៉ោង ៨ព្រឹកតៅ មាន៨គូ ត្រូវនិង ៨ប្រភេទទម្ងន់ ៤៨ ៥១ ៥៤ ៥៧ ៦០ ៦៣,៥ ៦៧ និង ៧១គីឡូក្រាម បន្ទាប់ពីប្រកួតចប់នឹងធ្វើពិធីបំពាក់មេដាយតែម្ដង។ នាល្ងាចនេះក៏ដល់ពេលដែលត្រូវបិទបញ្ចប់ពិធីកីឡាជាតិលើកទី២ ជាផ្លូវការផងដែរនៅពហុកីឡដ្ឋានជាតិ បន្ទាប់ពីបើកការប្រកួតតាំងពីថ្ងៃទី២៥ ឧសភា ២៩១៨ កន្លងទៅ៕
Via :news.sabay
