ការប្រកួតកីឡាជាតិលើកទី២ បានបញ្ចប់ដោយជោគជ័យទាំងការប្រកួត និងការរៀបចំពិធីបើក-បិទ ដែលទទួលបានការគាំទ្រពេញទំហឹងពីយុវជន សិស្ស-និស្សិត និងថ្នាក់ដឹកនាំក្នុងជួររាជរដ្ឋាភិបាលកម្ពុជា ក្នុងនោះថ្នាក់ដឹកនាំ និងនិស្សិតរបស់សាកលវិទ្យាល័យអាស៊ីអឺរ៉ុប ដែលបានចូលរួមអបអរសាទរទាំងពិធីបើក និងពិធីបិទ ក៏បានសម្ដែងនូវមោទនភាព និងបន្តអំពាវនាវឲ្យយុវជន និងប្រជាពលរដ្ឋចូលរួមគាំទ្រកីឡាជាតិ ដើម្បីឆ្ពោះទៅសម្រេចគោលដៅ ក្នុងការធ្វើម្ចាស់ផ្ទះកីឡាស៊ីហ្គេមលើកទី៣២ នាឆ្នាំ២០២៣ផងដែរ។
លោក ពៅ ហុក ប្រតិភូកីឡារបស់សាកលវិទ្យាល័យអាស៊ីអឺរ៉ុបបានលើកឡើងថា កីឡាជាតិពិតជាព្រឹត្តិការណ៍ដ៏សំខាន់ សម្រាប់វាស់ស្ទង់កម្រិតសមត្ថភាពមន្ត្រីបច្ចេកទេស អាជ្ញាកណ្ដាលចៅក្រម ពិសេសគឺកីឡាករ-កីឡាការិនី ដើម្បីចម្រាញ់បាននូវធនធានអត្តពលិកឆ្នើម សម្រាប់ត្រៀមធ្វើម្ចាស់ផ្ទះកីឡាស៊ីហ្គេមឆ្នាំ២០២៣។ លោកបន្តថា ទោះបីការរៀបចំនៅខ្វះខាតបន្តិចបន្តួចក្ដី ប៉ុន្តែរយៈពេល ៥ឆ្នាំនៅសល់ លោកជឿជាក់ថា ថ្នាក់ដឹកនាំ និងស្ថាប័នពាក់ព័ន្ធនឹងកីឡា នឹងព្យាយាមកែតម្រូវធ្វើឲ្យបានកាន់តែល្អប្រសើរ។ ដោយឡែកកញ្ញា វណ្ណា សុធាល័ក្ខ និស្សិតឆ្នាំទី១ ផ្នែកគ្រប់គ្រងសណ្ឋាគារ និងទេសចរណ៍ នៃសាកលវិទ្យាល័យអាស៊ីអឺរ៉ុបបានបញ្ជាក់ថា ក្នុងនាមយុវជន-យុវនារីរបស់កម្ពុជា ខ្លួនពិតជារីករាយក្នុងសកម្មភាព ចូលរួមលើកស្ទួយវិស័យកីឡាជាតិ។ ប៉ុន្តែដោយមើលឃើញកីឡាករមួយចំនួន មិនទាន់ទទួលបានការគាំទ្រផុសផុលនៅឡើយ កញ្ញារូបស្រស់ម្នាក់នេះបានអំពាវនាវឲ្យប្រជាពលរដ្ឋ ចូលរួមគាំទ្រ និងលើកទឹកចិត្តឲ្យបានគ្រប់ប្រភេទកីឡា ព្រោះនាងយល់ថា ការចូលរួមរបស់ប្រជាពលរដ្ឋ គឺជាកម្លាំងអភិវឌ្ឍន៍ដ៏សំខាន់ក្នុងវិស័យកីឡា។
សូមបញ្ជាក់ថា កីឡាជាតិលើកទី២ ឆ្នាំ២០១៨ គឺមានអត្តពលិកជាង ៤,០០០នាក់មកពី ២៨រាជធានី-ខេត្ត និងក្រសួងចូលរួម។ ប៉ុន្តែអ្វីដែលពិសេសបំផុតគឺពិធីបើក-បិទព្រឹត្តិការណ៍ ២ឆ្នាំម្ដងនេះ សុទ្ធតែរៀបចំឡើងក្រោមអធិបតីភាពដ៏ខ្ពង់ខ្ពស់បំផុតរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត។ ហើយអ្វីដែលកាន់អស្ចារ្យគឺពិធីបើក ត្រូវបានព្រះមហាក្សត្រនៃព្រះរាជាណាចក្រកម្ពុជា សព្វព្រះរាជហឬទ័យប្រោសព្រះរាជទានភ្លើងគប់ សម្រាប់បើកការប្រកួតផ្លូវការ អមដោយការរៀបចំនូវផ្ទាំងទស្សនីយភាពដ៏អស្ចារ្យជាច្រើនទៀតផង៕
By: BTV
ថ្នាក់ដឹកនាំ និងនិស្សិតអាស៊ីអឺរ៉ុបគាំទ្រកីឡាជាតិ ដើម្បីជំរុញការអភិវឌ្ឍឆ្ពោះទៅស៊ីហ្គេមឆ្នាំ២០២៣
អត្ថបទទាក់ទង
