ភ្នំពេញ៖ បន្ទាប់ពីសហព័ន្ធកីឡាអេឡិចត្រូនិកកម្ពុជាបានរៀបចំការប្រកួតជ្រើសរើសជើងឯកជាតិរបស់ខ្លួនកាលពីថ្ងៃទី៣ ខែធ្នូកន្លងទៅនេះរួចមក ភាគីថៃបានផ្ញើរសារអបអរសាទរចំពោះការស្វែងរកឃើញក្រុមជើងឯក ព្រមទាំងបានអញ្ជើញក្រុមតំណាងកម្ពុជាចូលរួមការប្រកួត MATIC 2018 ដែលនឹងប្រព្រឹត្តទៅចាប់ថ្ងៃទី១៣ ដល់១៤ ខែមករា ឆ្នាំ២០១៨ ខាងមុខនេះថែមទៀតផង ។
ដូច្នេះក្រុម Never Care នឹងក្រុម Infinity ដែលជាក្រុមជើងឯក និងជើងឯករងប្រចាំឆ្នាំនេះ នឹងក្លាយជាក្រុមតំណាងឲ្យប្រទេសកម្ពុជា ដើម្បីចូលរួមប្រកួតប្រជែងក្នុងព្រឹត្តិការណ៍កម្រិតតំបន់អាសុីនេះ ។ លោក Sento ដែលជាប្រធានក្រុមរបស់ Never Care បានលើកឡើងថា នេះជាលើកទី៦ហើយសម្រាប់ក្រុមរបស់លោក ដែលបានចូលរួមប្រកួតក្នុងព្រឹត្តិការណ៍ MATIC នេះ ហើយកាលពីឆ្នាំមុនក្រុមកម្ពុជារបស់យើងជាក្រុមជើងឯកក្នុងព្រឹត្តិការណ៍មួយនេះ ដូច្នេះភារកិច្ចចម្បងនៅឆ្នាំនេះគឺត្រូវការពារតំណែងជើងឯងតែម្តង ។
ទន្ទឹមនឹងនេះ លោកយល់ឃើញថាការប្រកួតក្រៅស្រុក និងក្នុងស្រុកពិតជាមានភាពលំបាក ពោលគឺមិនអាចធ្វេសប្រហែសបានឡើយ ព្រោះក្រុមនីមួយៗសុទ្ធតែជាក្រុមខ្លាំងតំណាងឲ្យប្រទេសរបស់ខ្លួន ហើយម្យ៉ាងទៀតក្រុមកម្ពុជាគឺជាឧបសគ្គចម្បងមួយរបស់ពួកគេ ជាហេតុធ្វើឲ្យពួកគេផ្តោតការយកចិត្តទុកដាក់ខ្ពស់លើយើង ។ ចំពោះការរៀបចំក្នុងការចេញទៅប្រកួតលើកនេះ លោកបានបញ្ជាក់ថា៖ «យើងបានព្យាយាមធ្វើការប្រមូលផ្តុំគ្នាមកហ្វឹកហាត់បានច្រើន ព្រោះយើងត្រូវទៅការពារជើងឯក ហើយណាមួយឆ្នាំនេះគេចាប់អារម្មណ៍ច្រើនមកលើកម្ពុជាយើង មួយវិញទៀតរាល់ការប្រកួតរបស់កម្ពុជានៅក្រៅស្រុកតែងតែទទួលបានលទ្ធផលល្អបើមិនលេខ១ ក៏បានលេខ២ដែរ ។ ចំពោះការហ្វឹកហាត់គឺយើងត្រូវធ្វើការណាត់គ្នាក្នុងមួយសប្តាហ៍ពី ៣ទៅ៤ដង ហើយក្នុងមួយថ្ងៃពី ៣ទៅ៤ម៉ោង ប៉ុន្តែបើសម្រាប់ថ្ងៃចុងសប្តាហ៍វិញគឺចំណាយពេលរហូតដល់ ៧ទៅ៨ ម៉ោងឯណោះ» ។
គួរបញ្ជាក់ផងដែរថា ក្រុម Never Care ជាក្រុមដ៏ល្បីល្បាញមួយក្នុងប្រទេសកម្ពុជារបស់យើងដែលភាគច្រើនតែងតែទទួលបានជោគជ័យទាំងក្នុងព្រឹត្តិការណ៍ជាតិ និងអន្តរជាតិ ។ យើងទាំងអស់គ្នានឹងរង់ចាំមើលថា តើក្រុម Never Care អាចការពារតំណែងជើងឯករបស់ខ្លួនក្នុងនាមជាជើងឯកពានរង្វាន់ MATIC 2018 ក៏ដូចជាអាចនាំកិត្តិយសជូនជាតិមាតុភូមិសារជាថ្មីក្នុងវិស័យកីឡាអេឡិចត្រូនិកនេះដែរឬយ៉ាងណា?
Via: camsports.org
Never Care ហ្វឹកហាត់ខ្លាំងទ្វេដងដើម្បីការពារតំណែងជើងឯក MATIC 2018 នៅប្រទេសថៃ
អត្ថបទទាក់ទង
