ខ្សែប្រយុទ្ធ Gareth Bale បន្តការវិលត្រលប់ពីរបួសជាមួយនឹងការស៊ុតបញ្ចូលទីគ្រាប់បើកឆាក ស្របពេល Real Madrid ទទួលជ័យជម្នះយ៉ាងងាយស្រួលក្នុងជើងទី១ទល់នឹង Numancia នៅយប់ថ្ងៃព្រហស្បតិ៍ទី៤ខែមករាឆ្នាំ២០១៨។
Bale ខានស៊ុតចូលក្នុងការប្រកួតនៅអេស្ប៉ាញតាំងពីខែកញ្ញាឆ្នាំ២០១៧មកម្ល៉េះ តែយប់មិញនេះតារាឆ្នើមវេលស៍ជំនាញជើងឆ្វេងរូបនេះទទួលបន្ទុកស៊ុតបាល់ពិន័យ១១ម៉ែត្រក្នុងនាទី៣៥ហើយធ្វើបានដោយជោគជ័យ។
ម្ចាស់ផ្ទះ Numancia ដែលកំពុងឈរលេខរៀងទី៥នៅលីគទី២អេស្ប៉ាញ សល់គ្នាតែ១០នាក់រយៈពេល៣០នាទីចុងក្រោយ ដោយ Pape Maly Diamanka រងពិន័យកាតលឿង២ដង។
Isco ដែលចូលលេងជំនួស Dani Ceballos ក្នុងនាទី៧៤ ក្រោយ Bale ប្ដូរចេញក្នុងនាទី៦១នោះ ស៊ុតបាល់ពិន័យ១១ម៉ែត្រឱ្យ Real មួយគ្រាប់ទៀតក្នុងនាទី៨៩ មុនពេលខ្សែប្រយុទ្ធវ័យក្មេង Borja Mayoral តែតគ្រាប់ចុងក្រោយក្នុងនាទី៩០+១។
ដោយឡែក គួរដឹងផងដែរថា រដូវកាល២០១៧-១៨នេះ Bale ទើបបានចូលលេង៦ដងប៉ុណ្ណោះនៅ La Liga ដោយសាររបួស។ ចំណែក Real ពេលនេះកំពុងសង្ឃឹមខ្ពស់ក្នុងការឆ្លងទៅវគ្គ៨ក្រុមចុងក្រោយ Copa del Rey ខណៈជើងទី២ធ្វើឡើងនៅថ្ងៃពុធសប្ដាហ៍ក្រោយ៕
ប្រែសម្រួល៖ សិរីមង្គល
ប្រភព&រូបថត៖ BBC
Via :keiladaily
