ក្រុមនីមួយៗក្នុងលីគកំពូលកម្ពុជាកំពុងចាប់អារម្មណ៍នាំចូលកីឡាករថ្មីៗ ដើម្បីពង្រឹងក្លឹបរបស់ខ្លួនត្រៀមរដូវកាលថ្មី។ ដើមរដូវកាល២០១៨ នេះមានរឿងភ្ញាក់ផ្អើលជាច្រើនបានកើតឡើង ដោយឡែកនៅដើមសប្ដាហ៍នេះក៏មានរឿងធំៗ៣បានកើតឡើងក្នុងវិស័យបាល់ទាត់ខ្មែរ។ ដើម្បីឲ្យប្រិយមិត្តដឹងច្បាស់ Sabay សូមបង្ហាញជូន៖
១- ប្រាក់ ធីវ៉ា ក្លាយជាទូតសុច្ឆន្ទៈរបស់ក្រុមហ៊ុន Mizuno ៖ ប្រាក់ ធីវ៉ា បានក្លាយជាទូតសុច្ឆន្ទៈរបស់ក្រុមហ៊ុននេះ ដោយទទួលបានការប្រើប្រាស់សម្ភារៈកីឡាពេញមួយឆ្នាំ២០១៨។ ការចុះកុងត្រានេះបានធ្វើឡើងកាលពីថ្ងៃទី១៦ ខែមករា ឆ្នាំ២០១៨។
២- ច្រឹង ពលរដ្ឋ នឹងអាចចេញពីក្រសួងការពារជាតិ៖ កាលពីពេលកន្លងទៅ កីឡាកររូបនេះត្រូវបានលោក ទេព ឡុងរចនា ជាគ្រូបង្វឹកស្រលាញ់ទម្រង់លេង និងសរសើរពីសមត្ថភាពរបស់ទូតសុឆន្ទៈរបស់ ICE WATCH ថែមទាំងចង់ឲ្យកីឡាកររូបនេះនៅជាមួយទ័ពឲ្យបានយូរអង្វែង។ ប៉ុន្តែរូបគេត្រូវបានក្លឹបអ្នកមានពីរកំពុងតាមប្រមាញ់ និងធ្វើការចរចា។ អ្វីដែលគួរឲ្យចាប់អារម្មណ៍នោះគឺរូបគេ នឹងអាចផ្លាស់ទៅវិសាខា ដែលជាក្លឹបទើបឡើងមកលេងលីគកំពូលកម្ពុជាលើកដំបូង។
៣- ទ័ពទម្លាយខ្ទង់ចំណាយឆ្នាំមុន និងប្រកាសកីឡាករចំណូលថ្មី៥រូប៖ ក្រសួងការពារជាតិបានទម្លាយខ្ទង់ចំណាយកាលពីរដូវកាលមុនប្រមាណ៤០ម៉ឺនដុល្លារអាមេរិក។ ពួកគេបានប្រកាសកីឡាករចំណូលថ្មីទាំង ៥នាក់ រួមមានខាងត្បូង៣នាក់ គឺខ្សែប្រយុទ្ធ Lee Junheob, ខ្សែការពារ Yoo Jae Ho ខ្សែប្រយុទ្ធ Na Hyosung រួមទាំងកីឡាករជប៉ុន ២នាក់ ខ្សែបម្រើ Yudai Ogawa ខ្សែប្រយុទ្ធ Daiki Matsumoto ៕
ប្រភពពី: Sabay
