បើគិតមកដល់ពេលនេះក្រុមទាំង ១២ ក្នុងលីគកំពូលកម្ពុជាមានតែក្រុមចំនួន ៣ ប៉ុណ្ណោះហាក់មានសភាពស្ងប់ស្ងាត់ក្នុងការនាំចូលកីឡាករថ្មី សម្រាប់ត្រៀមលីគរដូវកាល២០១៨។
លីគរដូវកាលថ្មីនឹងចាប់ផ្ដើមនៅថ្ងៃទី៣ ខែមីនា ក្លឹបដែលមានសភាពស្ងប់ស្ងាត់ក្នុងការនាំចូលកីឡាករថ្មីគឺមាន អគ្គស្នងការដ្ឋាននគរបាលជាតិ (ប៉ូលិស) វេស្ទើនភ្នំពេញ និងណាហ្គាវើល។ សម្រាប់ ណាហ្គាវើល លោក មាស ចាន់ណា បានបញ្ជាក់ថា មិនទាន់នាំចូលកីឡាករថ្មីសូម្បីម្នាក់ឡើយ ទាំងកីឡាករខ្មែរ និងបរទេស ។
ខណៈក្រុមបឹងកេត លោក បែ មករា អ្នកចាត់ការធ្លាប់បានបញ្ជាក់ថា ពួកគេនឹងប្រើកីឡាករបរទេសដដែលសិន ព្រោះការចុះបញ្ជីកីឡាករបរទេសក្នុងការត្រៀមលេង AFC Cup មានរយៈពេលខ្លីពេក ដែលធ្វើឲ្យលោកស្វែងរកកីឡាករថ្មីក្នុងចុះបញ្ជីមិនទាន់។
ដោយឡែកក្រុម ៨ ផ្សេងទៀតមាន ក្រសួងការពារជាតិ អាស៊ីអឺរ៉ុប ភ្នំពេញក្រោន ព្រះខ័នរាជស្វាយរៀង សូលទីឡូអង្គរ វិសាខា អគ្គិសនី និងអង្គរ Tiger សុទ្ធតែមានព័ត៌មានជុំវិញការចូលកីឡាករថ្មីៗ ក្នុងនោះក៏មានក្លឹបខ្លះបានចុះកុងត្រារួចរាល់ផងដែរ៕
Via: Sabay
