កីឡាករជើងខ្លាំងគុនខ្មែរវ័យក្មេង ព្រឿង សុជាតិ ថា បើទោះជាឥលូវមានអាជីពជាអ្នកប្រដាល់ក៏ដោយ ប៉ុន្តែនៅចិញ្ចឹមចិត្តចង់បន្តការសិក្សានៅមហាវិទ្យាល័យទៀតឲ្យតែមានពេលទំនេរបន្តិច។
ព្រឿង សុជាតិ បានឲ្យដឹងថា ដោយសារតែជីវភាពក្រលំបាកពេក ទើបធ្វើឲ្យរូបគេសម្រេចចិត្តផ្អាកការសិក្សាសិនបន្ទាប់ពីជាប់បាក់ឌុបកាលពី ឆ្នាំ២០១៣ កន្លងទៅនេះ ហើយងាកមកចាប់អាជីពប្រដាល់មួយរយៈពេលសិន។ ទោះផ្អាកការសិក្សាមកដល់ពេលបច្ចុប្បន្ននេះក៏ដោយ ប៉ុន្តែអ្នកប្រដាល់រូបនេះមិនដែលបំភ្លេចក្ដីបំណងបន្តការសិក្សានោះឡើយ។
អ្នកប្រដាល់មកពីខេត្តត្បូងឃ្មុំខាងលើអះអាងទៀតថា ដោយសារឥលូវនេះជាប់រវល់ច្រើននិងការហ្វឹកហាត់ ការឡើងប្រកួត ព្រមទាំងចង់សាងកេរ្តិ៍ឈ្មោះក្នុងវិស័យប្រដាល់សិនទើបឆ្លៀតងាកទៅរកការសិក្សាវិញ។
សម្រាប់អ្នកលេងគុនខ្មែររូបនេះ ការសិក្សាពិតជាមានសារសំខាន់ខ្លាំងណាស់ចំពោះគេ ការសិក្សានឹងធ្វើឲ្យជីវិតរបស់គេ កាន់តែប្រសើរឡើង អាចថានៅពេលខាងមុខឡើងសង្វៀនផងនិងធ្វើការផងដែរ ណាមួយអាជីពប្រដាល់ក៏មិនអាចប្រកួតរហូតនោះទេ។
ឆ្លើយតបនិងសំនួរថាតើចង់រៀនផ្នែកអ្វី? នៅសាលាមួយណា? កីឡាករវ័យ ២៥ឆ្នាំម្នាក់នេះប្រាប់ថា ចង់បន្តផ្នែកច្បាប់ ហើយនៅសាលាណាក៏បានដែរឲ្យតែមានមុខវិជ្ជានេះ។
ព្រឿង សុជាតិ បញ្ចប់ថ្នាក់ទី១២នៅវិទ្យាល័យ សិលាវេទី គាត ឈុន ក្នុងឆ្នាំ២០១៣។ បច្ចុប្បន្នជាអ្នកប្រដាល់ក្នុងសមាគមក្រសួងការពារជាតិ និងចូលប្រឡូកក្នុងវិស័យប្រដាល់នេះប្រហែលជិត២ឆ្នាំមកហើយ។ អ្នកប្រដាល់រូបនេះប្រកួតចុងក្រោយឈ្នះកីឡាករថៃដោយពិន្ទុនៅសង្វៀនបាយ័នបឹងស្នោ៕
ប្រភពពី: Sabay