ការប្រកួតកីឡាតេក្វាន់ដូ ITF ជ្រើសរើសជើងឯកថ្នាលពានរង្វាន់ឯកឧត្តម បួន លឹមហេង លើកទី១ ឆ្នាំ២០១៨ ដែលបានបញ្ចប់កាលពីល្ងាចថ្ងៃអាទិត្យ ម្សិលមិញ នៅវិមានពហុកីឡដ្ឋានជាតិ បានរកឃើញអត្តពលិកមានគុណភាព ជាច្រើន ដែលមានសមត្ថភាព អាចដាក់ចូលក្នុងការប្រមូលផ្តុំក្រុមថ្នាលបាន។
លោក បួន ហ៊ីងសុធីយ៉ា អគ្គលេខាធិការសហព័ន្ធកីឡាតេក្វាន់ដូ ITFកម្ពុជា បានប្រាប់ក្រោយការប្រកួតថា៖«យើងធ្លាប់បានរៀបចំការប្រកួតជ្រើសរើសជើងឯកថ្នាលនេះ ២លើកមកហើយ ចំណែកការប្រកួតពានរង្វាន់ឯកឧត្តម បួន លឹមហេង នេះ វាជាលើកទី១ ដែលយើងធ្វើឡើង ប៉ុន្តែបើប្រៀបធៀបកម្រិតនៃការប្រកួត គឺនៅឆ្នាំនេះ មានអ្នកចូលរួមច្រើនជាងកន្លងទៅ ហើយគុណភាពរបស់ពួកគេ មានការរីកចម្រើន ទាំងលើបច្ចេកទេសមេគុន និងប្រយុទ្ធ»។
តាមរយៈការប្រកួតត្រឹម២ថ្ងៃ នៅវិមានពហុកីឡដ្ឋានជាតិនោះ មានអត្តពលិកចំនួន១២១នាក់(ស្រី៣៥នាក់) មកពី១១ក្លិប បានចូលរួម ហើយនៅក្នុងចំណោមអ្នកទាំងនេះ គឺភាគច្រើន សុទ្ធតែដណ្តើមបានមេដាយមាស ប្រាក់ និងសំរឹទ្ធ ព្រោះការប្រកួតនេះ មានរហូតដល់២៦វិញ្ញាសា និងបានកំណត់ចំណាត់ថ្នាក់ពីលេខ១ លេខ២ និងលេខ៣ស្ទួន។
ទាក់ទងនឹងអ្នកទទួលបានមេដាយមាស ក្នុងការប្រកួតនេះ លោក បួន ហ៊ីងសុធីយ៉ា បានបញ្ជាក់ថា៖«សម្រាប់អ្នកទទួលបានជយលាភី ក្នុងការប្រកួតនេះ យើងបានសម្លឹងឃើញរហូតដល់៤ទៅ៥នាក់ ដែលអាចដាក់ចូលឲ្យហ្វឹកហាត់ ក្នុងការប្រមូលផ្តុំក្រុមថ្នាល នៅឆ្នាំក្រោយ ព្រោះពួកគាត់ មានការរីកចម្រើន មែនទែន»។
ជាមួយការទទួលបានជោគជ័យ ការប្រកួតកីឡាតេក្វាន់ដូ ITF ជ្រើសរើសជើងឯកថ្នាលពានរង្វាន់ឯកឧត្តម បួន លឹមហេង លើកទី១ ឆ្នាំ២០១៨នេះ លោក បួន លឹមហេង ប្រធានកិត្តិយសសហព័ន្ធកីឡាតេក្វាន់ដូ ITFកម្ពុជា បានសម្តែងការសប្បាយរីករាយខ្លាំង ហើយលោកបានសន្យាថា នឹងរៀបចំឲ្យមានការប្រកួតនេះ ជារៀងរាល់ឆ្នាំ៕
Via :cambosport
ពានរង្វាន់ បួន លឹមហេង រកឃើញក្រុមថ្នាល មានគុណភាព សម្រាប់ប្រមូលផ្តុំ
អត្ថបទទាក់ទង
