ភ្នំពេញៈ ការប្រកួតកីឡាតេក្វាន់ដូ ITF ជ្រើសរើសជើងឯកថ្នាល ពានរង្វាន់ឯក ឧត្តម បួន លឹមហេង ឆ្នាំ ២០១៨ ដែលបានបញ្ចប់កាលពីល្ងាចថ្ងៃអាទិត្យ ត្រូវបានមន្ត្រីសហព័ន្ធកីឡាតេក្វាន់ដូ ITF កម្ពុជា ចាត់ទុកថា ជាការរួមចំណែកយ៉ាងសំខាន់ ក្នុងការបណ្តុះថ្នាក់ថ្នាលជំនាន់ក្រោយ សម្រាប់បន្តវេនលើប្រភេទកីឡានេះ និងសម្រាប់ឆ្ពោះទៅកាន់ការប្រកួតស៊ីហ្គេម ដែលកម្ពុជាត្រូវធ្វើជាម្ចាស់ផ្ទះ។
បើទោះបីជាការប្រកួតនេះ ត្រូវបានធ្វើឡើង ត្រឹម ២ ថ្ងៃ នៅវិមានពហុកីឡដ្ឋានជាតិ ប៉ុន្តែអត្តពលិកចំនួន ១២១ នាក់ (ស្រី ៣៥ នាក់) ដែលភាគច្រើនជាយុវជន មកពីក្លិបចំនួន ១១ បានព្យាយាមប្រកួតប្រជែងគ្នាយ៉ាងស្វិតស្វាញបំផុត ដើម្បីក្លាយជាម្ចាស់ជយលាភី នៅលើប្រភេទវិញ្ញាសា ដែលមានរហូតដល់ ២៦ ក្រោមការកោតសរសើរពីថ្នាក់ដឹកនាំ និងមន្ត្រីកីឡាជាច្រើនទៀត ដែលបានចូលរួមក្នុងពិធីបិទការប្រកួត កាលពីល្ងាចថ្ងៃអាទិត្យ នោះ។
តាមរយៈការប្រកួតនោះដែរ លោក បួន ហ៊ីងសុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF កម្ពុជា បានមើលឃើញថា អត្តពលិកវ័យក្មេង ដែលទទួលបានជយលាភីទាំងនោះ សុទ្ធតែមានសមត្ថភាពល្អ ដែលអាចជាអ្នកស្នង បន្តវេន លើប្រភេទកីឡាតេក្វាន់ដូ ITF ទៅថ្ងៃអនាគត និងជាធនធាន សម្រាប់ត្រៀមការប្រកួតកីឡា ស៊ីហ្គេម ឆ្នាំ ២០២៣។
លោកបាននិយាយ ក្រោយការប្រកួតថា៖ «គោលបំណងធំទី ១ របស់យើង គឺយើងត្រៀមខ្លួនឆ្ពោះទៅកាន់ការប្រកួតស៊ីហ្គេម ឆ្នាំ ២០២៣ ហើយ ១ ទៀត យើងត្រូវសម្រិតសម្រាំងកីឡាថ្នាលរបស់យើង សម្រាប់ការហ្វឹកហ្វឺនក្រុមជម្រើសជាតិ និងត្រៀមដុសខាត់ពួកគាត់ ដើម្បីស្នង ឬបន្តវេនអ្នកជំនាន់មុន ក៏ដូចជា សម្រាប់ត្រៀមការប្រកួតនៅលើឆាកអន្តរជាតិ ផ្សេងៗទៀត»។
ជាមួយនឹងទិសដៅវែងឆ្ងាយនេះ លោក បួន ហ៊ីងសុធីយ៉ា បានបញ្ជាក់ថា៖ «ក្មេងៗ ដែលទទួលបានជយលាភី នៅក្នុងការប្រកួតនេះ យើងនឹងជ្រើសរើសពួកគាត់ឲ្យចូលហ្វឹកហាត់ ក្នុងក្រុមជម្រើសជាតិថ្នាល នៅឆ្នាំក្រោយ ប៉ុន្តែយើងត្រូវមាននីតិវិធីមួយទៀត គឺជ្រើសរើសរវាងអ្នកឈ្នះ និងអ្នកឈ្នះ សម្រាប់ដាក់ក្នុងក្រុមថ្នាលរបស់យើង ហើយបើតាមដែលខ្ញុំមើលឃើញ គឺមានអត្តពលិកវ័យក្មេងរហូតដល់ ៤ ទៅ ៥ នាក់ ព្រោះពួកគាត់ មានការរីកចម្រើនមែនទែន»។
ចំណែក លោក បួន លឹមហេង ជាប្រធានកិត្តិយសសហព័ន្ធកីឡាតេក្វាន់ដូ ITF កម្ពុជា បានសម្តែងការសប្បាយរីករាយយ៉ាងខ្លាំង ចំពោះការខិតខំប្រឹងរបស់សហព័ន្ធ ក្នុងការបង្កើតឲ្យមានព្រឹត្តិការណ៍នេះឡើង ដែលនៅតែធ្វើឲ្យលោក អាចចូលរួមជួយដល់កីឡាតេក្វាន់ដូ ITF និងលើកទឹកចិត្តដល់យុវជនឲ្យចូលរួមប្រកួតកីឡានេះ។
ជាមួយគុណប្រយោជន៍នេះ លោក បួន លឹមហេង ជាឪពុករបស់លោក បួន ហ៊ីងសុធីយ៉ា បានប្រកាស ក្នុងពិធីបិទការប្រកួត កាលពីល្ងាចថ្ងៃអាទិត្យ នោះដែរ លោកនឹងព្យាយាមរៀបចំការប្រកួតកីឡាតេក្វាន់ដូ ITF ជ្រើសរើសជើងឯកថ្នាលពានឯកឧត្តម បួន លឹមហេង នេះឲ្យបានជារៀងរាល់ឆ្នាំ ដើម្បីចូលរួមបណ្តុះថ្នាក់ថ្នាល លើប្រភេទកីឡានេះ ឲ្យបានច្រើន និងប្រកបដោយគុណភាព សម្រាប់ប្រកួតប្រជែងរកមេដាយ នៅលើឆាកអន្តរជាតិ ជូនកម្ពុជា នាថ្ងៃអនាគត៕
Via :postkhmer