កម្ពុជាបានដាក់ចេញផែនការមេរួចរាល់ហើយក្នុងនោះកីឡាចំនួន៣៤ប្រភេទគ្រោងនឹងយកឲ្យបានមេដាយមាសចំនួន៩៦គ្រឿងសម្រាប់កីឡាស៊ីហ្គេមឆ្នាំ២០២៣ដែលកម្ពុជាទទួលរៀបចំធ្វើម្ចាស់ផ្ទះជាលើកដំបូង។
តាមការបង្ហាញឲ្យដឹងក្នុងមហាសន្និបាតរបស់គណៈកម្មាធិការជាតិអូឡាំពិកកម្ពុជាកាលពីពេលថ្មីៗនេះ កម្ពុជាបានដាក់ចេញកីឡា៣៤សម្រាប់ដណ្តើមយកមេដាយមាសក្នុងព្រឹត្តិការណ៍កីឡាស៊ីហ្គេមឆ្នាំ២០១៩ នៅប្រទេសហ្វីលីពីន ឆ្នាំ២០២១នៅប្រទេសវៀតណាម និងឆ្នាំ២០២៣ដែលកម្ពុជាធ្វើម្ចាស់ផ្ទះ។ បើតាមគោលដៅនេះមានន័យថា សម្រាប់ឆ្នាំ២០២៣ចំនួនមេដាយមាសបានកើនឡើងជាង៣ដង បើប្រៀបធៀបនឹងស៊ីហ្គេមឆ្នាំ២០១៩ និងកើនឡើងជាង២ដង បើប្រៀបធៀបនឹងស៊ីហ្គេមឆ្នាំ២០២១។
កម្ពុជាបានកំណត់យកមេដាយមាស២២គ្រឿងនៅឆ្នាំ២០១៩ និងកំណត់យកមេដាយមាស៥៦គ្រឿងសម្រាប់ឆ្នាំ២០២១ ខណៈឆ្នាំ២០២៣កំណត់យកមេដាយមាស៩៦គ្រឿង ៕
