សហព័ន្ធកីឡាបាល់ទាត់ពិភពលោក (FIFA) នឹងរៀបចំកិច្ចប្រជុំកំពូល FIFA Executive Football Summit 2018 នៅកម្ពុជាថ្ងៃនេះ ដោយមានប្រទេសចូលរួមជាង២០ផ្សេងទៀត។
លោកខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា បានថ្លែងប្រាប់ឲ្យដឹង នៅក្រោយការមកដល់នៃលោក Infantino ប្រធាន FIFA នាល្ងាចថ្ងៃទី៨ ខែកុម្ភៈកន្លងទៅថា មានមូលហេតុ២ ដែលធ្វើឲ្យសហព័ន្ធកីឡាបាល់ទាត់ពិភពលោក មកប្រជុំនៅកម្ពុជា គឺទី១ ដោយសារកម្ពុជា ជាប្រទេសមានសុខសុវត្ថិភាព និងដោយសារសហព័ន្ធកីឡាបាល់ទាត់កម្ពុជា (FFC) មានទំនាក់ទំនងល្អជាមួយ FIFA។
មួយវិញទៀតនេះជាមោទនភាពសម្រាប់កម្ពុជាហើយដែល FIFA សម្រេចជ្រើសជាកន្លែងប្រជុំ ត្បិតអីនៅតំបន់អាស៊ាននេះ មានតែសិង្ហបុរីមួយប៉ុណ្ណោះ ធ្លាប់រៀបចំកម្មវិធីនេះឡើងកាលពីឆ្នាំ២០១៦កន្លងទៅ។
កិច្ចប្រជុំរបស់ FIFA នេះ គឺផ្ដោតជាចម្បងលើការអភិវឌ្ឍបាល់ទាត់ ដូចទៅអ្វីដែលកម្ពុជាត្រូវការ។ លោកបញ្ជាក់ថា FFC បានបង្កើតសាលាបាល់ទាត់បានទូទាំង ២៥ ខេត្ត-រាជធានីទូទាំងប្រទេស ដើម្បីអភិវឌ្ឍបាល់ទាត់ ដែលប្រភពចំណូលដ៏ធំ គឺបានមកពី FIFA៕
អត្ថបទ៖ មុន្នីរម្យ
Via :news.sabay
