ភ្នំពេញ: តាមសេចក្តីជូន-ដំណឹងពីសហព័ន្ធកីឡាអុកចត្រង្គកម្ពុជា និងគណៈ កម្មាធិការជាតិអូឡាំពិកកម្ពុជា សហការជាមួយសហភាពសហព័ន្ធយុវជនកម្ពុជា នឹងបើកការ ប្រកួតអុក ចត្រង្គ រដូវកាលឆ្នាំថ្មីឆ្នាំ ២០១៨ ដោយត្រៀមប្រកួតជម្រុះ ៣ ដំណាក់ កាល និងមានការចូលរួមទាំង ២៥ ខេត្ត និងរាជធានី ដោយចាប់ទទួលពាក្យពីថ្ងៃ ១៤ ខែកុម្ភៈ ឆ្នាំ ២០១៨ នេះតទៅហើយ។
ជាមួយគ្នានេះតាមខ្លឹមសារនៃសេចក្តីជូនដំណឹងដែលភ្នំពេញ ប៉ុស្តិ៍ ទទួលបាន ការប្រកួតត្រូវបានបែងចែកជា ៧ មណ្ឌល ហើយក្នុងមណ្ឌលនីមួយៗយ៉ាងតិចមានបេក្ខជនពី ៣ ទៅ ៤ ខេត្ត ចូលរួម។
លោកឈាវ បូរ៉ា អគ្គលេខាធិការសហព័ន្ធកីឡាអុកចត្រង្គកម្ពុជា និងជាអតីតស្តេចអុកចត្រង្គមហាសង្គ្រាន ២ ឆ្នាំជាប់ៗគ្នា ពោលគឺឆ្នាំ ២០១៤ និងឆ្នាំ ២០១៥ បានឲ្យដឹងថា៖ «ការប្រកួតឆ្នាំ ២០១៨ នេះ មាន ៣ ដំណាក់កាល ចែកចេញជា ៧ មណ្ឌល ខណៈដែលក្នុងមួយមណ្ឌលមានបេក្ខជនចូលប្រកួតប្រជែងយ៉ាងតិចចំនួន ៣ ខេត្ត ដើម្បីជម្រុះក្នុងដំណាក់កាលទី ១ ជម្រើសអ្នកឈ្នះតំណាងតាមមណ្ឌលឡើងមកប្រកួតថ្នាក់ជាតិ។
លោកឈាវ បូរ៉ា បានបន្តថា មណ្ឌលទី ១ ព្រះសីហនុ មានខេត្តព្រះសីហនុ ខេត្តកែប ខេត្តកំពត និងខេត្តកោះកុង។ មណ្ឌលទី ២ កំពង់ស្ពឺ មានខេត្តកំពង់ស្ពឺ ខេត្តកំពង់ឆ្នាំង ខេត្តកណ្តាល និងខេត្តតាកែវ។ មណ្ឌលទី ៣ កំពង់ចាមមានខេត្តកំពង់ចាមខេត្តត្បួងឃ្មុំខេត្តព្រៃវែង និងខេត្តស្វាយរៀង។
មណ្ឌលទី ៤ បាត់ដំបងមានខេត្តបាត់ដំបងខេត្តពោធិ៍សាត់ខេត្តប៉ៃលិន។ មណ្ឌលទី ៥ សៀមរាប មានខេត្តសៀមរាប ខេត្តកំពង់ធំ ខេត្តព្រះវិហារ ខេត្តបន្ទាយមានជ័យ និងខេត្តឧត្តរមានជ័យ។ មណ្ឌលទី ៦ ក្រចេះ មានខេត្តក្រចេះ ខេត្តស្ទឹងត្រែង ខេត្តរតនគិរី និងមណ្ឌលគិរី។
មណ្ឌលទី ៧ ភ្នំពេញ មានតែរាជធានីភ្នំពេញមួយប៉ុណ្ណោះ ប៉ុន្តែ មានបេក្ខជនច្រើនចូលប្រកួតប្រជែង។
លោកឈាវ ប៉ូរ៉ា បានបន្ថែមថា៖ «ការប្រកួតនៅតាមមណ្ឌលចាប់ផ្តើមពីថ្ងៃទី ២០ ខែកុម្ភៈ ឆ្នាំ ២០១៨ តទៅ ដោយជម្រើសយកតាមមណ្ឌលតែ ៣ នាក់ប៉ុណ្ណោះមកប្រកួតនៅថ្នាក់ជាតិ ដំណាក់កាលទី ២ ជ្រើសយកចំនួន ៨ រូបដើម្បីទៅប្រកួតផ្តាច់ព្រ័ត្រយកចំណាត់ថ្នាក់លេខ ១ ស្តេចអុកតែម្តង នៅឯមុខប្រាសាទអង្គរខេត្តសៀមរាប នៅខែមេសា ពោលគឺនៅថ្ងៃចូលឆ្នាំប្រពៃណីជាតិតែម្តង។
លោកក្រូច ចន្ថារិទ្ធ ហៅត្រេន ដែលជាជើងខ្លាំងម្នាក់ធ្លាប់ឈ្នះជើងឯកឆ្នាំ ២០០១ និងជើងឯករង ប្រចាំឆ្នាំ ២០១៤ នោះ បាននិយាយឲ្យដឹងថា៖ «ការប្រកួតប្រជែងឆ្នាំ ២០១៨ នេះ ខ្ញុំមិនចូលរួមទេដោយដាក់ខ្លួនចូលនិវត្តន៍ ហើយមកធ្វើជាមន្ត្រីបច្ចេកទេសរបស់សហព័ន្ធវិញ និងទុកឱកាសឲ្យក្មេងៗបង្ហាញសមត្ថភាព»។
លោកបានបញ្ជាក់ថា៖ «ការដាក់ពាក្យប្រកួតឆ្នាំ ២០១៨ នេះ គិតត្រឹមថ្ងៃនេះ មានបេក្ខជនជិត ១០០ នាក់ ហើយក្នុងនោះជើងខ្លាំងមួយចំនួនមានដូចជា ឆយ វីរ៉ា ស្តេចអុកឆ្នាំ ២០១៧ ហេងសៅឌី លោកសុខ លឹមហេង លោកប៊ុន គាសេង លោករស់ រិទ្ធាយ៉ា លោកប៊ូ ប៊ុនម៉ាឌីកា និងលោកឈាវ បូរ៉ា បានដាក់ពាក្យរួចរាល់ហើយ ដើម្បីប្រកួតជម្រុះតាមមណ្ឌល។
លោកឈាវ បូរ៉ា ជើងឯកស្តេចអុក ២ ជំនាន់ បាននិយាយថា៖ «ឆ្នាំ ២០១៨ នេះ ខ្ញុំចូលប្រកួតប្រជែងនៅមណ្ឌលកំពង់ចាម ហើយរំពឹងថា នឹងឈ្នះបានឈានមកប្រកួតនៅដំណាក់កាលទី ២ នៅគណៈកម្មាធិការជាតិអូឡាំពិកកម្ពុជា ហើយបន្តដល់ដំណាក់កាលទី ៣ នៅខេត្តសៀមរាប។ ទោះជាយ៉ាងណាលោកឈាវ បូរ៉ា នៅតែឲ្យតម្លៃដល់ពួកយុវជនវ័យក្មេងមួយចំនួនមានបច្ចេកទេសលេងល្អ និងអាចយកឈ្នះជើងចាស់ៗមួយចំនួន ពិសេសការហ្វឹកហាត់របស់ពួកគេតាមរយៈប្រព័ន្ធកុំព្យូទ័រជាផ្នែកជំនួយស្មារតីបានល្អ បំបែកក្បួនរបស់អ្នកលេងជើងចាស់។
លោកខុម ក្រឹម ប្រធានរៀបចំការចុះឈ្មោះអ្នកលេងអុកចត្រង្គនៅខេត្តសៀមរាប បានប្រាប់ថា៖ «គិតត្រឹមថ្ងៃនេះ ខេត្តសៀមរាប មានអ្នកចុះឈ្មោះរួចរាល់បានចំនួន ១១ នាក់ ហើយការប្រកួតជម្រុះនឹងធ្វើតាមបច្ចេកទេសនៃការរៀបចំរបស់សហព័ន្ធ ដែលនឹងប្រកួតតាមរូបមន្តជម្រុះវិលជុំរកអ្នកឈ្នះចំនួន ៣ នាក់ទៅប្រកួតដំណាក់កាលទី ២ នៅភ្នំពេញ»៕
Via :postkhmer