ភ្នំពេញ: រឿង សោភ័ណ្ឌ របស់កម្ពុជាបានត្រឹមស្មើជាមួយកីឡាករថៃ Chai Sou ក្នុងទម្ងន់ ៦៩ គីឡូក្រាម ក្រោយពីបាន តស៊ូ ៥ ទឹកពេញ ក្នុងការប្រកួតមិត្តភាពអន្តរជាតិកម្ពុជា-ថៃកាលពីព្រឹកថ្ងៃអាទិត្យ ទី ២៥ ខែកុម្ភៈ ឆ្នាំ ២០១៨ នៅសង្វៀនអាស៊ីអាគ្នេយ៍។
ចំណែកលទ្ធផលគូដណ្តើមខ្សែក្រវាត់ខារ៉ាបាវ កាលពីល្ងាចថ្ងៃសៅរ៍ វិញ មឿន សុខហ៊ុច ត្រូវបានអាជ្ញាកណ្តាលលោកយឹម សុខុម ឯកភាពជាមួយគណៈកម្មការបានសម្រេចឲ្យចាញ់តែម្តងនៅក្នុងទឹកទី ៣ ក្រោយពីកីឡាករកម្ពុជារូបនេះមិនបានស្តាប់ការហាមឃាត់របស់អាជ្ញាកណ្តាល បន្ទាប់ពីបានបោកច្រាន Phich Nam Ek ឲ្យដួលទៅលើខ្សែរេញ មុននឹងបន្ថែមមួយជើងចូលមុខបណ្តាលឲ្យសន្លប់ធំតែម្តង ដែលជាករណីល្មើសច្បាប់ និងលក្ខខណ្ឌប្រកួត។ គូខ្សែក្រវាត់មួយគូទៀតជឹម ចិត្ត្រា បានផ្តួលកីឡាករថៃ Kong Kangvan ឲ្យសន្លប់ត្រឹមទឹកទី ៤។
រឿង សោភ័ណ្ឌ មកពីក្លិបមកុដរាជសីហ៍នៃក្រសួងមហាផ្ទៃ និងកីឡាករថៃជើងខ្លាំងជំនាញជង្គង់ Chai Sou ត្រូវបានគណៈកម្មការប្រកាសឲ្យស្មើគ្នា បន្ទាប់ពីការប្រកួត ៥ ទឹកពេញនោះ។ រឿង សោភ័ណ្ឌ មានប្រៀបផ្នែកកណ្តាប់ដៃនៅទឹកទី ២ និងទឹកទី ៥ ហើយកីឡាករ Chai Sou មានប្រៀបបន្តិចបន្តួចនៅទឹកទី ៣ និងទឹកទី ៤ ខណៈទឹកទី ១ មានភាព ប្រហាក់ប្រហែលគ្នា។
លទ្ធផលនេះ ធ្វើឲ្យអ្នកទស្សនា ហាក់ដូចជាស្ងប់ស្ងៀមគ្មានប្រតិកម្មអ្វីឡើយ ខណៈដែលការប្រកួតរបស់រឿង សោភ័ណ្ឌ លើកនេះមិនសូវបានល្អដូចសព្វដង ហើយកណ្តាប់ដៃវាយចេញមិនធ្ងន់ចូលគោលដៅល្អដូចមុន ស្របពេលដែលកីឡាករថៃ Chai Sou បានប្រើស្នៀតជង្គង់មិនល្អវាយចេញត្រូវតែខ្យល់ដូចគ្នា។
រឿង សោភ័ណ្ឌ បាននិយាយក្រោយប្រកួតថា៖ «លទ្ធផលស្មើគ្នានេះ ខ្ញុំទទួលយកបាន ពីព្រោះគេបានតែឱបរំខានខ្ញុំតែប៉ុណ្ណោះ គឺជង្គង់មិនចូលគោលដៅទេ»។
ចំពោះបញ្ហាវាយមិនសូវបានល្អ និងខ្លាំងដូចមុននោះ សោភ័ណ្ឌ បានប្រាប់ថា៖ «មុនប្រកួតប៉ុន្មានថ្ងៃនេះ ខ្ញុំខកខានមិនបានហាត់ល្អទេ ដោយនៅជួយមើលម្តាយឈឺ និងនាំគាត់ទៅពេទ្យ ហេតុនេះកម្លាំងឆាប់ខ្សោយជាងមុន ប៉ុន្តែការប្រកួតមិនអាចខកខានបានទេកុំឲ្យខូចកម្មវិធី»។
គូអមលក្ខណៈអន្តរជាតិជាមួយគ្នានេះដែរ ផុន ផាន់ណា មកពីក្លិបខ្លារខិន បានចាញ់ពិន្ទុកីឡាករ Jul Lieng មកពីប្រទេសបារាំង ក្នុងទម្ងន់ ៦៩ គីឡូក្រាម។
ក្នុងការប្រកួតចំនួន ៥ ទឹក ផុនផាន់ណា បានប្រឹងប្រែងអស់ពីសមត្ថភាព ហើយបើទោះបីចាញ់ប្រៀបកីឡាករមកពីបារាំងសឹងតែគ្រប់ទឹកក៏ដោយ ប៉ុន្តែ រូបគេតស៊ូបាន ៥ ទឹកពេញមុននឹងចាញ់ពិន្ទុ៕
Via :postkhmer
