ក្រុមអគ្គស្នងការដ្ឋាននគរបាលជាតិ (ប៉ូលិស) បានធ្វើឲ្យការប្រកួតបើកឆាកលីកកំពូលកម្ពុជា ឆ្នាំ២០១៨ របស់ក្រុមវេស្ទើន បានបញ្ចប់ដោយភាពខកចិត្តខ្លាំងបំផុត ស្របពេលក្រុមម្ចាស់ជើងឯក បឹងកេត និងភ្នំពេញក្រោន សុទ្ធតែដណ្តើមបាន៣ពិន្ទុដូចគ្នា។
សម្រាប់ការប្រកួតបើកឆាក នៅពហុកីឡដ្ឋានជាតិ កាលពីល្ងាចថ្ងៃសៅរ៍នោះ ក្រុមប៉ូលិស បានលត់វេស្ទើន រហូតដល់ ៦-០។ ខ្សែប្រយុទ្ធ ទិត្យ ឌីណា ជាអ្នកបានគ្រាប់បាល់បើកឆាកឲ្យក្រុមប៉ូលិស នៅនាទីទី១០ គឺមុនពេល Suzuki Yuta បានបន្ថែម១គ្រាប់ទៀត នៅនាទីទី៣៩ ដើម្បីនាំមុខក្រុមវេស្ទើន ២-០ នៅក្នុងតង់ទី១។
ចំណែកនៅតង់ទី២ ខ្សែប្រយុទ្ធ នួន បូរី និង No Daeho សុទ្ធតែរកបានម្នាក់២គ្រាប់ដូចគ្នា។ ឌីណា រកបានគ្រាប់បាល់ទី១របស់គេ នៅនាទីទី៧៥ ហើយ No Daeho នៅនាទីទី៨២ ឯគ្រាប់បាល់ទី២របស់អ្នកទាំង២នេះ បានកើតមានឡើងនៅនាទីទី៩០ ដូចគ្នា។
លទ្ធផលនេះបាននជួយឲ្យក្រុមប៉ូលិស ឡើងទៅឈរនៅកំពូលតារាងលីកកំពូលកម្ពុជា ប្រចាំឆ្នាំ២០១៨នេះ បានមុនគេ ប៉ុន្តែការចាញ់ ៦-០ នេះ វាជាលទ្ធផលដ៏អាក្រក់បំផុត ចំពោះក្រុមវេស្ទើន ដែលបានធ្លាក់ទៅឈរនៅបាតតារាង បានមុនគេ ហើយអ្នកតាមដានការប្រកួតបាល់ទាត់នៅកម្ពុជា ស្ទើរតែមិនចង់ជឿ ជាមួយលទ្ធផលបែបនេះ។
សម្រាប់ការប្រកួត កាលពីថ្ងៃសៅរ៍នោះដែរ ក្រុមម្ចាស់ជើងឯក បឹងកេត បានរកគ្រាប់បាល់មុខនាំក្រុមអាស៊ីអឺរ៉ុប រហូតដល់៤-០ ដោយក្នុងនោះខ្សែប្រយុទ្ធនីហ្សេរីយ៉ា Julius រកបាន៣គ្រាប់តែម្នាក់ឯង នៅនាទីទី៤ ទី៦៧ និងនាទីទី៧៥ ឯ១គ្រាប់ទៀតរកបានដោយខ្សែប្រយុទ្ធ Omogba នៅនាទីទី៤៤ ប៉ុន្តែអាស៊ីអឺរ៉ុប បានវាយបករកបាន៣គ្រាប់វិញ ធ្វើឲ្យបឹងកេត ឈ្នះ៣ពិន្ទុ ទាំងព្រលឹងចុងសក់។
ចំណែកក្រុមចំណូលថ្មី សូលទីឡូអង្គរ បានទម្រង់លេងដ៏គួរឲ្យគត់សម្គាល់ ហើយអ្នកគាំទ្រស្មោះស្ម័គ្ររបស់ក្រុមមួយនេះ ក៏បានធ្វើឲ្យមានការចាប់អារម្មណ៍ផងដែរ សម្រាប់ការប្រកួតបើកឆាកជាមួយក្រុមភ្នំពេញក្រោន នៅកីឡដ្ឋាន RSN កាលយប់ថ្ងៃសៅរ៍នោះដែរ ប៉ុន្តែ សូលទីឡូអង្គរ បានចាញ់ភ្នំពេញក្រោន ១-០ ដ៏គួរឲ្យសោកស្តាយ។
ការចាញ់នេះ ដោយសារខ្សែការពារ សូលទីឡូអង្គរ បានធ្វើឲ្យខ្សែប្រយុទ្ធ Jorrin John របស់ភ្នំពេញក្រោន ដួលនៅក្នុងតំបន់គ្រោះថ្នាក់ នាំឲ្យលោកអាជ្ញាកណ្តាលពិន័យកាតលឿង និងផ្តល់បាល់ពិន័យ១១ម៉ែត្រ ឲ្យខាងក្រុមភ្នំពេញក្រោន ហើយខ្សែប្រយុទ្ធ Pouya Hosseini ជាអ្នកស៊ុតបានសម្រេច នៅនាទីទី១០ ដើម្បីជួយឲ្យភ្នំពេញក្រោន ឈ្នះ៣ពិន្ទុទាំងលំបាកលើកនេះ៕
ក្រុមប៉ូលិស ធ្វើឲ្យ វេស្ទើន ជួបការខកចិត្តធំ ថ្ងៃបើកឆាកលីកកំពូលកម្ពុជា
អត្ថបទទាក់ទង
