លោក Alan LM Mccune ជាជើងខ្លាំងម្នាក់ដែលលេចមុខការពារបុគ្គលល្បីៗក្នុងកម្មវិធីធំៗផ្លូវការនៅប្រទេសកម្ពុជា។ ថ្មីៗនេះលោកទើបតែបញ្ចប់ភារកិច្ចការពារអតីតកំពូលតារាបាល់ទាត់លំដាប់ពិភពលោក Ryan Giggs ដែលបានមកប្រទេសកម្ពុជារយៈពេល៣ថ្ងៃ ប៉ុន្តែមានមនុស្សតិចណាស់ដែលបានស្គាល់ពីប្រវត្តិរបស់លោក។
លោក Alan LM Mccune ប្រាប់ Sabay ថា លោកជាជនជាតិស្កុតឡែន និងបានមកនៅប្រទេសកម្ពុជាតាំងពីឆ្នាំ២០១៣ ប៉ុន្តែធ្លាប់ធ្វើដំណើរលក្ខណៈកម្សាន្តមកកម្ពុជាតាំងពីឆ្នាំ២០០៧ម៉្លេះ។ បន្ទាប់ពីលោកបានមកប្រទេសកម្ពុជា លោកពិតជាស្រលាញ់វប្បធម៌ និងបែបបទនៃការរស់នៅរបស់ប្រទេសកម្ពុជាយ៉ាងខ្លាំង។
លោកបានក្លាយជាអង្គរក្សរយៈពេល៣២ឆ្នាំហើយគិតដល់ពេលនេះ។ រយៈពេល៣២ឆ្នាំកន្លងទៅនេះលោកបានការពារឥស្សរជនល្បីៗច្រើនទាំងតារាភាពយន្តហូលីវូដ តារាបាល់ទាត់ល្បីៗ និងបុគ្គលល្បីៗជាដើម។ លោកប្រាប់ថា ៖«ខ្ញុំធ្វើជាអង្គរក្សតាំងពីអាយុ១៨ឆ្នាំ។ ខ្ញុំធ្លាប់ការពារតារាល្បីលំដាប់ពិភពលោកដូចជាតារាហូលីវូដលោក George Clooney លោក Rod Steward ជាកំពូលតារាចម្រៀងអង់គ្លេស លោក Russel Crowe ជាផលិតករភាពយន្តជាដើម»។ លោកធ្លាប់ធ្វើជាអង្គរក្សក្នុងពិធីបើកសម្ពោធធំៗជាច្រើននៅស្រុកខ្មែរ និងការពារតារាល្បីៗដូចជាតារាចម្រៀងអៀរឡង់ Bono តារាចម្រៀងល្បីរបស់អាមេរិកនាង Jessi មកកម្ពុជា និងតារាមកពីថៃផងដែរ។ ចុងក្រោយនេះ លោកបានបំពេញភារកិច្ចការពារអតីតកំពូលតារាបាល់ទាត់ពិភពលោក Ryan Giggs ដែលមកប្រទេសកម្ពុជា៣ថ្ងៃ។
Alan ដែលមានមាឌធំមើលទៅគួរឲ្យខ្លាចស័ក្ដិសមជាអង្គរក្សបន្តទៀតថា លោកបានហ្វឹកហាត់កីឡាគុនចម្រុះ MMA រយៈពេល១៧ឆ្នាំជាមួយគ្រូបង្វឹក MMA ល្បីៗលំដាប់ពិភពលោកដូចជាលោកគ្រូ Erik Paulson Rick Young, Roger Gracie ជាដើម។ ឆ្នាំ២០០៥ លោកបានឈ្នះមេដាយមាសពីការប្រកួតក្នុងព្រឹត្តិការណ៍ Gracie Invitational Brazilian Jujitsu ដែលរៀបចំនៅប្រទេសអង់គ្លេស។
ឆ្នាំ២០១៣លោកបានមកប្រទេសកម្ពុជាដែលពេលនោះលោកបានក្លាយជាគ្រូបង្វឹកកីឡា MMA។ លោកថា «៖«ខ្ញុំត្រូវបានលោកគ្រូ Paddy Carson និងលោក ម៉ា សេរី អញ្ជើញឲ្យធ្វើជាគ្រូបង្វឹកក្នុងកម្មវិធីប្រដាល់ក្នុងទ្រុង KWC របស់ទូរទស្សន៍ MYTV។ ខ្ញុំបានបង្ហាត់កម្មវិធីប្រដាល់នោះបាន៣រដូវកាល និងបង្ហាត់កីឡាករខ្មែរប្រហែលជា៧៥នាក់ដូចជាកីឡាករ ខុន ស៊ីចាន់ ដែលទើបតែឈ្នះការប្រកួតនៅ One Championship កាលពីពេលថ្មីៗនេះ»។
បច្ចុប្បន្នលោកបង្ហាត់នៅក្លឹប Phnom Penh MMA, Prokout និង Banteay Center។ លើសពីនេះទៀតលោកជាមួយនឹងគ្រូយូដូលោក ឡាច វុទ្ធី កំពុងរៀបចំបង្កើតការប្រកួត ជើងឯកគុនចម្រុះកម្ពុជា (Cambodian MMA Champion)៕
