ភ្នំពេញ៖ ក្រុមអាណាចក្របៃតងបានក្លាយជាម្ចាស់ជើងឯកពានរង្វាន់ដ៏ធំប្រចាំកម្ពុជា Tiger Street Football Festival 2018 បន្ទាប់ពីបានយកឈ្នះក្រុមស្នងការដ្ឋាននគរបាលខេត្តព្រះសីហនុ (A) ដោយលទ្ធផល ២-១ នៅវគ្គផ្តាច់ព្រ័ត្រ។
ក្រោយលទ្ធផលវគ្គពាក់កណ្តាលផ្តាច់ព្រ័ត្រឃើញថា 3G FC បានចាញ់ ស្នងការដ្ឋាននគរបាលខេត្តព្រះសីហនុ (A) ដោយលទ្ធផល ០-១ ខណៈក្រុមយុវជនទួលតាឯក មកពីខេត្តបាត់ដំបងបានចាញ់ក្រុម អាណាចក្របៃតង ដោយលទ្ធផល ២-៣។
ទីបំផុត ក្រុម 3G FC ទទួលបានចំណាត់ថ្នាក់លេខ៣ បន្ទាប់ពីយកឈ្នះក្រុមលេខ៤ យុវជនទួលតាឯកដោយលទ្ធផលចាស់ដៃ ៤-០។ ក្រុមខ្លាំងប្រចាំរាជធានីភ្នំពេញ អាណាចក្របៃតង ទទួលបានចំណាត់ថ្នាក់លេខ១ បន្ទាប់ពីយកឈ្នះ ស្នងការដ្ឋាននគរបាលខេត្តព្រះសីហនុ (A) ដោយលទ្ធផលតឹងតែង ២-១។
ចំពោះរង្វាន់ជើងឯកទូទាំងប្រទេស ក្រុមលេខ១៖ អាណាចក្របៃតង ទទួលបានពាន១ មេដាយមាស និងរង្វាន់ ១៥ ០០០ ដុល្លារអាមេរិក, ក្រុមលេខ២៖ ស្នងការដ្ឋាននគរបាលខេត្តព្រះសីហនុ (A) ទទួលមេដាយប្រាក់ និងរង្វាន់ ៥ ០០០ ដុល្លារអាមេរិក។ ក្រុមលេខ៣៖ 3G FC ទទួលមេដាយសំរឹទ្ធ និងរង្វាន់ ២ ៥០០ ដុល្លារអាមេរិក។ ក្រុមលេខ៤៖ យុវជនទួលតាឯក ទទួលបានរង្វាន់ ១ ០០០ ដុល្លារអាមេរិក។
ពិធីប្រគល់រង្វានបានប្រារព្ធធ្វើឡើងក្រោមវត្តមានដ៏ខ្ពង់ខ្ពស់របស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងអតីតកំពូលតារាបាល់ទាត់លំដាប់ពិភពលោក Ryan Giggs ជាទូតសុឆន្ទៈប្រចាំម៉ាកសញ្ញាស្រាបៀរថៃហ្គ័រ និងតំណាងក្រុមហ៊ុនស្រាបៀរថៃហ្គ័រ ព្រមទាំងអ្នកគាំទ្រយ៉ាងច្រើនកុះករផងដែរ។
