ភ្នំពេញ: កីឡាករប្រដាល់ជំនាញប្រើក្បាច់កណ្តាប់ដៃ និងឈ្នះខ្សែក្រវាត់ច្រើនស្ថាប័នជាងគេ រឿង សោភ័ណ្ឌ របស់ក្លិបមកុដរាជសីហ៍នៃក្រសួងមហាផ្ទៃ ត្រូវបានថ្នាក់ដឹកនាំកីឡានៃសហព័ន្ធកីឡាប្រដាល់គុនខ្មែរធ្វើពិធីសំណេះសំណាលលើកទឹកចិត្ត និងផ្តល់ប្រាក់រង្វាន់កាលពីល្ងាចថ្ងៃទី ២ ខែមេសា ឆ្នាំ ២០១៨ នៅទីស្នាក់ការសហព័ន្ធ មុនចេញដំណើរទៅកាន់ប្រទេសបារាំង នៅថ្ងៃនេះ។
លោកមៀម ស៊ីសារ៉ា ប្រធានសហព័ន្ធគុនខ្មែរអន្តរជាតិ ដែលដឹកនាំទៅប្រកួតបានឲ្យដឹងថា៖ «សោភ័ណ្ឌ ត្រូវហ្វឹកហាត់ និងប្រកួតនៅប្រទេសបារាំងចំនួន ៣ ខែ ក្នុងគម្រោងប្រកួតចំនួន ៣ លើក។ ការប្រកួតរបស់គេមានចំនួន ៣ ប្រកួត ប៉ុន្តែនៅមិនទាន់ដឹងថាត្រូវជួបជាមួយអ្នកប្រដាល់មកពីប្រទេសណានៅឡើយទេពីព្រោះមានកីឡាករប្រទេសច្រើនចូលរួម ហើយអ្វីៗវាស្ថិតនៅលើការចាប់ឆ្នោត នៅពេលជិតដល់ថ្ងៃប្រកួត»។
លោកបានបន្តថា៖ «ក្រៅពីការប្រកួត សោភ័ណ្ឌ នៅមានកាតព្វកិច្ចមួយទៀតគឺផ្សព្វផ្សាយពីកីឡាប្រដាល់គុនខ្មែរ នៅទ្វីបអឺរ៉ុប ពីព្រោះការប្រកួតនោះភាគច្រើនជាអ្នកប្រដាល់ជនជាតិអឺរ៉ុប ដែលគេហ្វឹកហាត់ប្រដាល់គុនខ្មែរ»។
លោកតែម ម៉ឺន ប្រធានសហព័ន្ធប្រដាល់គុនខ្មែរ មានប្រសាសន៍ថា៖ «នេះជាការចេញទៅប្រកួតមានការអនុញ្ញាតត្រឹមត្រូវពីសហព័ន្ធប្រដាល់គុនខ្មែរ និងពីស្ថាប័នពាក់ព័ន្ធនានាដូចជាក្រសួងអប់រំ យុវជន និងកីឡា ជាដើម»។
លោកបន្តថា៖ «នៅប្រទេសបារាំងខុសពីស្រុកខ្មែរទាំងអាកាសធាតុ ពេលវេលា ហេតុនេះកីឡាករត្រូវប្រុងប្រយ័ត្នចំពោះការហ្វឹកហាត់ថែទាំសុខភាព ដើម្បីឲ្យការប្រកួតទទួលបានលទ្ធផលល្អ ពីព្រោះជាមុខមាត់របស់ប្រទេសជាតិ»។
លោកយុទ្ធ ភូថង ប្រធានកិត្តិយសសហព័ន្ធកីឡាប្រដាល់គុនខ្មែរសំណូមពរឲ្យសោភ័ណ្ឌ ខិតខំហ្វឹកហាត់ និងប្រកួតឲ្យអស់ពីសមត្ថភាព ទោះបីចាញ់ឬឈ្នះ កុំឲ្យមានភាពមិនប្រក្រតីកើតឡើងឲ្យសោះ ពីព្រោះរូបគេចេញទៅតំណាងឲ្យសហព័ន្ធ ក៏ដូចជាប្រទេសទាំងមូល។
លោកបន្តថា៖ «កាលពីជិត ១០ ឆ្នាំមុន ប្រដាល់ខ្មែរមិនសូវល្បីល្បាញដូចបច្ចុប្បន្ននេះទេ មិនតែប៉ុណ្ណោះសព្វថ្ងៃយើងបានដាក់ប្រភេទកីឡាប្រដាល់គុនខ្មែរនេះ ចូលក្នុងព្រឹត្តិការណ៍ប្រកួតអន្តជាតិគឺស៊ីហ្គេមជាផ្លូវការរួចទៅហើយ ប៉ុន្តែការជួបជាមួយអ្នកប្រដាល់ថៃ កីឡាករកម្ពុជាយើងនៅមានកម្រិតទាបជាងនៅឡើយ ហេតុនេះយើងត្រូវប្រឹងប្រែងបន្ថែមទៀត»។
ជាមួយនឹងការសំណេះសំណាលនោះ លោក យុទ្ធ ភូថង និងសប្បុរសជននានា មានទីប្រឹក្សាសហព័ន្ធបានឧបត្ថម្ភនូវថវិកាមួយចំនួនដល់កីឡាកររឿង សោភ័ណ្ឌ ដើម្បីជាការលើកទឹកចិត្តមុននឹងចេញទៅប្រកួតនាថ្ងៃទី ៤ ខែមេសា ឆ្នាំ ២០១។ សោភ័ណ្ឌ ជាអ្នកប្រដាល់ពូកែកណ្តាប់ដៃឆ្វេង ទឹកចិត្តប្រកួតរឹងមាំ វាយច្បាស់ដោយស្នៀតកណ្តាប់ដៃចេញមានប្រសិទ្ធភាពទាំងកែង កណ្ដាប់ដៃ ជង្គង់ និងទាត់។ រូបគេមានអាយុ ២៧ ឆ្នាំ មានប្រវត្តិប្រកួតចំនួន ១៦០ ដង ឈ្នះ ១៤០ ដង ចាញ់ ១៥ ដង ស្មើពិន្ទុ ៥ ដង ក្នុងនោះវាយគូប្រកួតឲ្យសន្លប់បាន ៦៥ដ ង។
យោងតាមកម្មវិធីប្រកួត រឿង សោភ័ណ្ឌ ចាប់ផ្តើមប្រកួតនៅថ្ងៃទី ២៨ ខែមេសា ឆ្នាំ ២០១៨ ក្នុងព្រឹត្តិការណ៍ដែលមានឈ្មោះថា The Fighters Night ក្នុងកាស៊ីណូ Grand Cercle ប្រទេសបារាំង ខណៈដែលអ្នកចូលរួមប្រកួតមានមកពីអាស៊ី និងអីរ៉ុប ប្រមាណជា ២០ ប្រទេស៕
Via: Postkhmer
