លោក ហ៊ីម ស្លៃម៉ាន់ គ្រូបង្គោលក្រុមបាល់ទាត់សម្ព័ន្ធ គណៈកម្មាធិការសម្របសម្រួលនិស្សិត និង បញ្ញវន្ដកម្ពុជា បានបង្ហាញពីការព្រួយបារម្ភយ៉ាងខ្លាំងចំពោះការប្រកួតវគ្គផ្ដាច់ព្រ័ត្រ KMH Cup U18 នៅពេលខាងមុខ ដ្បិតប្រព្រឹត្តទៅចំអំឡុងខែបុណ្យរ៉ាម៉ាដន របស់សាសនាឥស្លាម។
គ្រូបង្វឹកក្រុមមានមូលដ្ឋាននៅច្រាំងចំរេះឲ្យដឹងថា សមាជិកក្រុុមខ្លួនភាគច្រើនជាខ្មែរឥស្លាម ហើយអំឡុងបុណ្យរ៉ាម៉ាដននេះ សាសនិកជនទាំងអស់មិនអាចបរិភោគអាហារ និង ផឹកទឹកបានឡើយ ចាប់ពីពេលព្រឹកដល់ម៉ោង៦ល្ងាច ដែលនេះធ្វើឲ្យប៉ះពាល់ខ្លាំងដល់ការប្រមូលផ្ដុំហ្វឹកហាត់ និង ប្រកួត។
លោក ហ៊ីម ស្លៃម៉ាន់ ប្រាប់ថា កំពុងរិះរកវិធីសម្របសម្រួលបញ្ហានេះឲ្យបានប្រសើរឡើងកុំឲ្យប៉ះពាល់ដល់ការប្រកួត។គ្រូបង្វឹកដដែលឲ្យដឹងថា បុណ្យរ៉ាម៉ាដន នេះប្រព្រឹត្តទៅចាប់ពីថ្ងៃទី១៦ ខែឧសភា ដល់ពាក់កណ្ដាលខែកក្កដា ខណៈវគ្គផ្ដាច់ព្រ័ត្រ KMH Cup U18 ធ្វើឡើងនៅថ្ងៃទី០១ ខែមិថុនា។
គួរដឹងដែរថា ក្រុមសម្ព័ន្ធ គ.ស.ន.ប.ក បានបញ្ចប់កំពូលតារាងវិលជុំសន្សំពិន្ទុ ដូច្នេះពួកគេត្រូវរង់ចាំស្វ័យប្រវត្តិនៅវគ្គផ្ដាច់ព្រ័ត្រ ដោយទទួលអ្នកឈ្នះនៅវគ្គពាក់កណ្ដាលផ្ដាច់ព្រ័ត្រ ដែលមានការប៉ះគ្នារវាងក្រុម KMH Academy U18 និង យុវជនព្រះខ័នរាជស្វាយរៀង៕
ប្រភពពី: keiladaily
