ក្រុមអធិរាជស Real Madrid បានរងការបរាជ័យលើកទី២ក្នុងក្របខណ្ឌCopa Del Rey ក្រោយត្រូវក្រុម អ្នកមាន បុណ្យBarcelonaលត់ ក្នុងលទ្ធផល ៣ទល់នឹង០ នៅឯទឹកដីSantiago Bernabeuសម្រាប់ការប្រកួតជើងទី២ ហើយបញ្ចប់ ក្នុងលទ្ធផលទាំងពីរជើងគឺ៤:១ ក្រោយការប្រកួតជើងទី១នៅកីឡាដ្ឋានCamp Nouលទ្ធផលស្មើគ្នា១:១។
ជាក់ស្តែងក្តីសង្ឃឹមក្នុងការឡើងទៅកាន់វគ្គផ្តាច់ព្រ័ត្រដែលត្រូវជួបValencia ប្រែជាខកខានក្រោយត្រូវរបូតគ្រាប់បាល់រហូតដល់ទៅ ២ ខណ:ពួកគេបានរបូតគ្រាប់បាល់រហូតដល់ទៅ ២ គ្រាប់ក្នុងរយ:ពេលត្រឹមតែ ៤ នាទី នៅចន្លោះនាទីទី៦៩ និង៧៣ ។ គួរបញ្ជាក់ថានៅអំឡុងពេលគ្រាប់បាល់ទី ៣ របស់ក្រុម Barcelona ចេញពីការស៊ុតបាល់ពិន័យ១១ម៉ែត្រ របស់កីឡាករ Luis Suarez និងជាគ្រាប់បាល់ទី២ក្នុងការប្រកួតនេះ អ្វីដែលមជ្ឈដ្ឋានបាល់ទាត់មានការ ចាប់អារម្មណ៍យ៉ាងខ្លាំងលើទង្វើមួយរបស់ខ្សែការពារកណ្តាល Sergio Ramos ។ កីឡាករអន្តរជាតិអេស្បាញរូបនេះបានប្រើសម្លេងខ្លាំងៗក្រើនរំលឹក មិត្តរួមក្រុមរបស់ខ្លួនដោយពាក្យសម្តីថា : “ស៊ូឡើងទាំងអស់គ្នា កុំអោយរបូតគ្រាប់បាល់រហូត៦គ្រាប់អី “។
ទោះបីជាយ៉ាងនេះក្តីគ្រូបង្វឹកសញ្ជាតិអាហ្សង់ទីនលោកSolari បាននិយាយថាក្រុមបានប្រឹងប្រែងលេង យើងមានឪកាស នៅតង់ទី១តែគ្មានសំណាង ហើយការការពារមិនបានល្អជាមូលហេតុនាំអោយក្រុមរបូតគ្រាប់បាល់ ។ វាគឺជាការប្រកួតប្រជែងដ៏ខ្លាំងក្លាជាយូរមកហើយ។
អត្ថបទ: Cambosport
