បរទេស៖ ក្លឹប Barcelona បានបង្ហាញមុខខ្សែការពារកណ្តាល Jules Kounde ជាផ្លូវការកាលពីថ្ងៃចន្ទ ខណៈដែលកីឡាករអន្តរជាតិបារាំងរូបនេះ បានប្រកាសថា រូបគេពិតជារីករាយណាស់ក្នុងការចូលរួមជាមួយនឹងក្លិបពោរពេញដោយមហិច្ឆតាមួយនេះ។
នៅក្នុងសន្និសីទសារព័ត៌មានជាលើកដំបូងរបស់គេ ក្នុងនាមជាកីឡាកររបស់ក្លិប Barcelona កាលពីថ្ងៃចន្ទ នៅឯទីលានហ្វឹកហាត់ ខ្សែការពារវ័យ២៣ឆ្នាំរូបនេះ បាននិយាយថា៖ «ខ្ញុំពិតជារីករាយណាស់ និងមានមោទនភាព។ ខ្ញុំកំពុងតែចូលរួមជាមួយនឹងក្លិបដ៏ធំមួយ និងពោរពេញដោយមហិច្ឆតា ហើយខ្ញុំក៏មានមហិច្ឆតាផងដែរ»។ បើយោងទៅតាមសារព័ត៌មានរបស់អេស្ប៉ាញ Barcelona បានផ្តល់តម្លៃខ្លួន៥០លានអឺរ៉ូ (ស្មើនឹង៥១លានដុល្លារអាមេរិក) ឲ្យក្លិប Sevilla បូករួមទាំងប្រាក់ឧបត្ថម្ភចំនួន១០លានអឺរ៉ូផ្សេងទៀត សម្រាប់ Kounde ដែលបានចុះកិច្ចសន្យារយៈពេល៥ឆ្នាំ។ រូបគេក៏ត្រូវបានទាក់ទងជាមួយនឹងការផ្ទេរទៅកាន់ក្លិប Chelsea របស់ក្របខ័ណ្ឌ Premier League ផងដែរ។
Kounde បានឲ្យដឹងថា៖ «ពិតណាស់ ខ្ញុំបានទទួលសំណើមួយផ្សេងទៀត ប៉ុន្តែ ខ្ញុំបានសម្រេចចិត្តរង់ចាំក្លិប Barcelona ដើម្បីឈានដល់ការព្រមព្រៀងគ្នាមួយជាមួយនឹងក្លិប Sevilla»។ ខ្សែការពាររូបនេះបានបន្ថែមទៀតថា៖ «នៅពេលដែលខ្ញុំបានមើលឃើញថា វាអាចទៅរួច ខ្ញុំបានជ្រើសរើសយក Barcelona ពីព្រោះខ្ញុំបានដឹងយ៉ាងច្បាស់ពីកន្លែងដែលខ្ញុំចង់ទៅ»៕
ប្រភពព័ត៌មាន៖ Channel News Asia