បរទេស៖ Raphinha បានធ្វើដំណើរទៅកាន់ក្លិប Barcelona ដើម្បីបំពេញការផ្ទេររបស់គេពីក្លិប Leeds United ក្រោយពីក្លិបរបស់អេស្ប៉ាញ បានយល់ព្រមលើតម្លៃខ្លួនរហូតដល់ទៅ៥៨លានអឺរ៉ូ (ស្មើនឹង៥៨,២លានដុល្លារអាមេរិក) បូករួមទាំងប្រាក់ឧបត្ថម្ភនានាចំនួន៩លានអឺរ៉ូផ្សេងទៀត។
ខ្សែបម្រើស្លាបអន្តរជាតិប្រេស៊ីលរូបនេះ បានបញ្ជាក់ពីបំណងរបស់គេក្នុងការផ្ទេរទៅកាន់កីឡដ្ឋាន Camp Nou ហើយរូបគេត្រូវប្រឈមនឹងបញ្ហាឈឺក្បាលជាច្រើន ខណៈដែល Barcelona បានព្យាយាមជម្នះលើវិបត្តិលើហិរញ្ញវត្ថុរបស់ខ្លួន ដើម្បីដាក់សំណើដែលអាចទទួលយកបានមួយ។ ប៉ុន្តែ ពួកគេបានបង្កើតឲ្យមានដំណោះស្រាយយ៉ាងល្អ ដើម្បីផ្តល់ការរីករាយដល់ Raphinha ប៉ុន្តែ បានផ្តល់ការខកចិត្តដល់ក្លិបជាច្រើនក្នុងក្របខ័ណ្ឌ Premier League។ ក្លិប Chelsea, Arsenal, Tottenham និង Newcastle សុទ្ធសឹងចាប់អារម្មណ៍លើការទិញយក Raphinha ស្របពេលដែលសំណើក្នុងតម្លៃខ្លួន៥៥លានផោនរបស់ក្លិប Chelsea ក៏ត្រូវបានទទួលយកដោយក្លិប Leeds ផងដែរ ប៉ុន្តែ បេះដូងរបស់កីឡាករប្រេស៊ីលរូបនេះ ស្ថិតនៅជាមួយនឹង Barcelona។
ក្លិប Barcelona បានឲ្យដឹងក្នុងសេចក្តីថ្លែងការណ៍មួយថា៖ «ក្លិប FC Barcelona និង Leeds United បានឈានដល់ការព្រមព្រៀងគ្នាមួយជាគោល ដើម្បីផ្ទេរ Raphael Dias Belloli ឬហៅថា Raphinha ដោយរង់ចាំតែកីឡាកររូបនេះ ពិនិត្យសុខភាពប៉ុណ្ណោះ »៕
ប្រភពព័ត៌មាន៖ Channel News Asia