បរទេស៖ ខ្សែប្រយុទ្ធ Robert Lewandowski បានបញ្ជាក់ថា លោក Xavi គ្រូបង្វឹករបស់ក្រុម Barcelona គឺជាកត្តាដែលនាំឲ្យរូបគេសម្រេចចិត្តចូលរួមជាមួយនឹងក្លិបរបស់អេស្ប៉ាញមួយនេះ ពីក្លិប Bayern Munich តាមរយៈការរៀបរាប់ថា ផ្នត់គំនិត និងនីតិវិធីរបស់អតីតខ្សែបម្រើរូបនេះ គឺជាមូលដ្ឋានមួយ សម្រាប់អនាគតដ៏អស្ចារ្យនៅកីឡដ្ឋាន Camp Nou។
Lewandowski បានបំពេញការផ្ទេររបស់គេទៅកាន់ក្លិប Barcelona ក្នុងតម្លៃខ្លួនជាគោលចំនួន៥០លានអឺរ៉ូ (ស្មើនឹង៥០,៧លានដុល្លារអាមេរិក) ក្រោយពីនៅជាប់កិច្ចសន្យារយៈពេល១ឆ្នាំ ជាមួយនឹងក្លិប Bayern។
ក្នុងពេលនិយាយនៅបណ្តាញសារព័ត៌មានផ្លូវការរបស់ក្លិប Barcelona ក្រោយពីបានចូលរួមជាមួយនឹងក្រុមថ្មីរបស់គេក្នុងដំណើរការប្រកួតមុនបើករដូវកាលនៅលើទឹកដីអាមេរិក ខ្សែប្រយុទ្ធអន្តរជាតិប៉ូឡូញវ័យ៣៣ឆ្នាំរូបនេះ បាននិយាយថា៖ «ខ្ញុំបាននិយាយគ្នាជាមួយនឹងលោក Xavi ហើយពីដំបូងឡើយ ខ្ញុំចង់ដឹងពីគំនិតរបស់គាត់ និងផែនការរបស់គាត់។ វាគឺជារឿងដ៏ងាយស្រួលសម្រាប់ខ្ញុំក្នុងការសម្រេចចិត្តផ្ទេរទៅកាន់ក្លិប Barcelona ដោយសារតែខ្ញុំគឺជាអ្នកដែលចង់លេង ចង់ឈ្នះ ហើយខ្ញុំគិតថា ជាមួយនឹងលោក Xavi វាអាចទៅរួច»៕
ប្រភពព័ត៌មាន៖ The Guardian